28/12/12

O Señor dos Aneis chega ao Monte Pindo en 2013

Só uns meses despois de confirmarse a rodaxe da secuela, hoxe podemos anunciar que o terceiro e último filme da adaptación cinematográfica da obra tolkiana "O Hobbit", precursora da célebre triloxía "O Señor dos Aneis", rodarase parcialmente no Olimpo Celta.

Afeitos as espectaculares panorámicas de Nova Zelanda que hoxe son moi populares ineternacionalmente por ambientar o mundo fabuloso do "Señor dos Aneis", o equipo de Peter Jackson reparou en que o espectacular macizo granítico do Monte Pindo é unha opción viábel para a rodaxe de varias escenas da terceira e última parte de "O Hobbit", que se unirá a Nova Zelanda e os estudos Stone Street, de Wellington coma localizacións elixidas.

Cando menos iso é o que nos transmitiron responsábeis dos estudos Warner Bros e MGM que veñen de porse en contacto coa nosa Asociación para visitar a principios de 2013 varios espazos emblemáticos do Monte Pindo e comprobar a súa ideoneidade á hora de encaixar algunha das secuencias que formarán parte do filme que prevén estrear nas salas de todo o mundo o 8 de xullo de 2014.

Só hai uns meses que se confirmou que habería terceira parte, que se subtitulará na súa versión orixinal "The Hobbit: There and Back Again", polo que de momento non podemos anticipar máis información, cales serán as escenas gravadas ou se tal vez os actores da saga pisarán a Costa da Morte: Ian McKellen (Gandalf), Martin Freeman (Bilbo Baggins) e Richard Armitage (Thorin Oakenshield), actores principais, ou ben o retorno de coñecidos personaxes de "O Señor dos Aneis" coma Cate Blanchett, Orlando Bloom, Christopher Lee, Hugo Weaving, Elijah Wood e Andy Serkis (Gollum), que nesta ocasión desenvolverán papeis secundarios.

Sexa como sexa, a Asociación Monte Pindo xa ofreceu a súa total colaboración coa produtora e celebra esta gran noticia pois considera que a aparición do Monte Pindo nunha das sagas literarias e cinematográficas máis exitosas da historia suporá un antes e un despois para o seu coñecemento a nivel mundial.

21/12/12

A Asociación Monte Pindo desexate un bo nadal e un mellor ano 2013!


Chegou o solsticio de inverno, e chegou tamén o momento de ollar atrás, ver en que acertamos e erramos. Pero sobre todo, é un bo momento para lembrarmos aqueles e aquelas que nos impulsan durante todo o ano a seguir loitando polos nosos soños. Esa loita non tería sentido sen o alento das miles de persoas e centos de entidades que en maior ou menor medida nos apoiades e axudades para que vaiamos avanzando con paso firme cara a realización dun proxecto, a declaración do Monte Pindo como Parque Natural, que hai só dous anos soaba a utopía mais que pode estar a un só paso de acadarse.

Comprácenos anunciarvos que en breve teremos unha reunión co Conselleiro de Medio Ambiente da Xunta de Galicia, Agustín Hernández Fenrández de Rojas, coa sinceira esperanza que será a definitiva antes de asentárense os piares para a declaración, nesta lexislatura, do Parque Natural do Monte Pindo.

Desde logo aquí estaremos un ano máis, ao igual que o Apalpador, para ben agradecerlle que por fin teña en conta a inxente demanda social cunha deliciosa presa de castañas, ou ben para deixarlle un anaco de carbón con forma de presión e reivindicación cidadá ata que entenda que o Olimpo Celta dos galegos, o monte sacro dos seus antergos, está ameazado e abandonado e non pode ser así.

Moitísimas grazas a todas e todos vós por acompañarnos nesta andaina con paso firme e paciente, sabendo que nada nos vai vir dado, mais sen renunciar a facer o que cremos que debemos facer. En definitiva, sen deixar de facer vosa a sabia reflexión de Eduardo Galeano:
"A utopía está no horizonte. Camiño dous pasos, ela alónxase dous pasos e o horizonte vaise dez pasos máis aló. Entón para que serve a utopía? Para iso, serve para avanzar."

BO NADAL
BO SOLSTICIO DE INVERNO
FELIZ ANO 2013
QUE TEÑADES UNHAS BOAS FESTAS!

14/12/12

Luar na Lubre brinda a presentación en Lugo do seu novo disco á protección do Olimpo Celta

Ilustración no disco Sons da lubre nas noites de luar
Os nosos amigos de Luar Na Lubre vén de publicar o seu último disco Sons da lubre nas noites de luar: Un bo agasallo para este Nadal. Este pack conten tres CD co mellor da música celta a nivel internacional. Un percorrido pola historia deste senlleiro grupo tan comprometido ca defensa da lingua e a cultura de Galiza por todo o mundo.

Tamén conten un DVD co concerto gravado en directo en Santiago de Compostela o 31 de xullo deste 2012. No DVD está a peza Monte Pindo, peza que Luar Na Lubre adicou o noso querido monte e serviu para dar a coñecer a reclamación do Parque Natural por todo o estado español. Alí onde os Luar Na Lubre acoden a dar un concerto sempre tocan esta preciosa composición, informando o publico que aló nos confíns da terra hai un monte,que os nosos vellos consideraban sagrado, e que unha asociación loita para que sexa declarado Parque Natural.

O pack trae un libriño preciosamente ilustrado por Estefanía Dominguez Cagigao. Nel aparece o Xigante e Penafiel e a fervenza do Coadoiro (nela pódese ler Monte Pindo Parque Natural!).

Nonito Pereira conta no libriño que Mike Oldfield estivo no Monte Pindo. En 1996 volve a dar a badalada, esta vez co seu novo disco The Voyager, no que o músico británico relata en clave celta unha viaxe musical que remata no alto dunha montaña que persoalmente asocio co Monte Pindo que se eleva sobre o mar e na que se poden descubrir fascinantes inscricións célticas, que el visitará na súa estancia galega. A viaxe iniciase, segundo el mesmo escrebe na folla promocional nas frondosidades dun bosque de Galicia onde o son do vento conta historias e evoca lendas.Quería capturar neste disco o espírito do mundo mitolóxico e intentar evocar as lendas dos antigos celtas.

Hoxe ás 20:30 no auditorio Gustavo Freire de Lugo, Luar Na Lubre dará un concerto de presentación do novo disco e cederá o 5% da recadación á nosa asociación. Animámosvos a todos os socios e seareiros que acudades a Lugo a escoitar a estes marabillosos músicos, e de paso colaboradedes ao financiamento de Monte Pindo Parque Natural.

Non podemos máis que dar novamente as grazas a Luar Na Lubre por todo canto fan para conseguir o Parque Natural do Monte Pindo.

23/11/12

A Torre dos Mouros xa ten o seu cómic

Portada da BD de Manel Cráneo
Boas novas para todo amante do patrimonio arqueolóxico galego, e do carnotán en particular. O artista gráfico Manel Cráneo e o equipo do Proxecto Torre dos Mouros van presentar o vindeiro venres 30 de novembro, a partir das 19:30 horas no Salón de Actos do Concello de Carnota, a banda deseñada "A Torre dos Mouros", unha esperadísima obra gráfica que procura explicar visualmente como puido ser a vida dos nosos ancestros no recinto amurallado do Monte do Castro en Lira.

O acto tamén servirá ao equipo para presentar as conclusións da Campaña 2012 de voluntariado neste espazo tan singular, e que deixaron multitude de achados que non deixan de sorprendernos mesmo aos que desenvolvemos boa parte da nosa vida nesta zona sen decatarnos do magnífico tesouro que xacía desapercibido baixo unha mesta capa de toxos a pouca distancia das nosas casas.

A Asociación Monte Pindo Parque Natural, que apoiou o proxecto desde o primeiro momento, sendo mesmo os responsábeis de por en contacto a Jordi Tato, neodescubridor do recinto, co equipo de inmensos profesionais e especialistas que finalmente porían a cara e a súa experiencia para crear esta exitosa iniciativa, convida agora a todos os nosos amigos e colaboradores a participar neste evento tan importante para o noso patrimonio.

Ademais, a todo o voluntariado que participou en calquera fase do proxecto, o equipo vaille regalar un exemplar dedicado polo autor. Para iso é necesario inscribirse nesta páxina. A filosofía de socializar os descubrimentos que marcou o proxecto desde os seus inicios tamén significa que se lle agasallará un exemplar a todos os nenos e nenas do noso concello.

Para todos e todas as que non poidan achegarse a Carnota o vindeiro venres, indicarlles que terán unha nova oportunidade nas seguintes datas:

  • XOVES, 13 DE DECEMBRO. Santiago de Compostela. Biblioteca Ánxel Casal ás 20 horas. Presentación da BD de Manel Cráneo.
  • VENRES, 14 DE DECEMBRO. A Coruña. Pub Dublín ás 20 horas. Barferencia sobre a Torre dos Mouros con presentación da BD e exposición de orixinais do cómic.

Non volo perdades! Velaquí un petisco para ir abrindo o apetito. Como vedes, o Monte Pindo tamén leva a súa parte!

15/11/12

Monte Pindo Parque Natural decide converterse en entidade de ámbito galego (Resumo da I Asemblea Xeral Ordinaria)

Traballaremos para que esta imaxe sexa historia en breve.
A I Asemblea Xeral Ordinaria de Socios e Socias da Asociación Monte Pindo Parque Natural desenvolviuse o pasado sábado 10 de novembro no Salón de Actos do Concello de Carnota, co obxecto de fiscalizar o traballo feito durante estes dous anos xustos de existencia da nosa entidade, analisar erros e acertos, e sobre todo enfocar correctamente os retos futuros, tendo moi en conta de que o noso obxectivo principal, a Declaración do Monte Pindo como Parque Natural, aínda non se conseguiu concretar en prazos e investimentos reais.

Abriu a Asemblea o presidente de Monte Pindo Parque Natural, Xilberto Caamaño, cunha presentación na que repasou os motivos que levaron a unha decena de veciños e veciñas de Carnota a reunirse no Paseo Marítimo do Pindo o 17 de outubro de 2010 para conformar un colectivo dedicado case en exclusiva á cuestión do Olimpo Celta. Unha iniciativa que nacera con certo temor a ser etiquetada de localista, pero que rematou consolidando o coñecemento e sensibilidade polo Monte Pindo no mundo enteiro.

De seguido foi o secretario Mario Maceiras o que defendeu o Informe de Xestión para estes dous anos presentado pola Comisión Rectora, no cal se destaca a enorme dimensión que adquiriu a nosa demanda e o noso colectivo, que moitos consideran dos máis activos e notorios do País. Ademais, salientou que o número de socios multiplicouse por 10 neste tempo, mentras que só tivemos que tramitar 3 baixas, unha delas por defunción. Finalmente, Maceiras fixo lectura dun resumo das actividades xa desenvoltas neste período.

Pola súa parte a tesoureira Merche Díaz presentou o Informe de Finanzas, que arroxa un saldo positivo nesta etapa a pesar de non termos recibido nunca un só euro de subvencións públicas e de manternos fieis á filosofía que caracterizou á nosa Asociación ata agora: apostar por financiarnos coa axuda das persoas asociadas e simpatizantes e non con patrocinios económicos de empresas privadas que puideran condicionar a nosa liberdade de acción.

A Asemblea tamén serviu para a renovación parcial da Comisión Rectora (máximo órgano directivo da entidade), pola baixa de Euloxio Franco por defunción e de Ramón Noceda para centrarse nas labores propias da alcaldía carnotá que agora obstenta. As propostas elixidas para cubrir esas vacantes son as de Manolo Souto, profesor no Colexio de Carnota, e Jorge Pérez, un mozo Enxeñeiro de Montes natural do Ézaro.

Pero xusto antes, debatérase o punto máis esperado da orde do día, a proposta de actividades para o ano 2013, que se saldou con moitas propostas novas das que destacamos as seguintes polo seu interese público:
  • A Asociación Monte Pindo Parque Natural aprobou converterse nunha Asociación de ámbito galego para axeitar o funcionamento á súa dimensión real
  • A Asociación Monte Pindo Parque Natural aprobou solicitar dos organismos competentes a Declaración de Utilidade Pública, dado que se entende que reúne todas as condicións para elo.
  • A Asociación Monte Pindo Parque Natural traballará para a creación dun Centro de Interpretación do Monte Pindo de contidos amplos e centrados no dito espazo natural e tamén estreitará os lazos co Centro de Interpretación da Fervenza sito na Casa de Pedra do Ézaro.
  • A Asociación Monte Pindo Parque Natural realizará a principios de ano un roteiro de limpeza para crear o primeiro roteiro circular con saída e chegada no lugar do Pindo.
  • A Asociación Monte Pindo Parque Natural é sensíbel ao deterioro preocupante dos gravados coñecidos no Pedregal, en especial da excomuñón de Penafiel, polo que aprobou un proxecto para obter calcos arqueolóxicos dos petroglifos do Monte Pindo, para que en caso de perdérense definitivamente, permitan o coñecemento e estudo deste patrimonio único polas xeracións vindeiras.
  • A Asociación Monte Pindo Parque Natural é sensíbel á profusión de pintadas e gravados nas pedras do entorno da Laxe da Moa, polo que aprobou elaborar un Programa de voluntariado para a limpeza dos graffitis do Monte Pindo e o establecemento de medidas disuasorias para evitar que se repitan no futuro.
Monte Pindo Parque Natural clausurou o acto despois de 2 horas e 7 minutos de intenso aluvión de ideas que servirán para afrontar con máis garantías de éxito e máis gañas de traballar, se cabe, polo futuro do macizo carnotán que aspira a ver protexidos os seus valores únicos mediante a Declaración nesta lexislatura do Monte Pindo como Parque Natural, que o desenvolva substentabelmente e tamén ás poboacións que o rodean, que deben ser as maiores beneficiarias e máximas partícipes de calquera figura de protección.


Extracto do Informe de Xestión

APOIOS INDIVIDUAIS

Estimamos que as adhesións a título particular superan as 10.000 persoas.

APOIOS COLECTIVOS

A nosa reivindicación xa conta co apoio formal dun cento de entidades de todo tipo que debemos agradecer individualmente:
  • A Broa Sendeirismo
  • A Ría non se vende
  • AC Canle (Lira)
  • AC Cultura do País
  • ACDR O Patín (Carnota)
  • aCentral Folque
  • AEC Verbo Xido (Terra de Montes)
  • Agrupación Micolóxica Naturalista Liboreiro (Bueu)
  • Amigos da Terra
  • Amigos dos Museos de Galicia
  • Amorim + Doporto Arquitectos
  • Árbore Consumo Consciente
  • ARCD Palavea Bravú (A Coruña)
  • ASOAR-ARMEGA
  • Asociación Ambiental Senda Nova
  • Asociación Cultural Mar de Muros
  • Asociación Cultural Monte da Estrela (Arteixo)
  • Asociación de afectados polo Parque Eólico Outes-Mazaricos (APEOM)
  • Asociación de Empresarios Costa da Morte
  • Asociación de Escritores en Lingua Galega (AELG)
  • Asociación de veciños Atocha, Monte Alto e Torre de Hércules (A Coruña)
  • Asociación de Veciños Os Castros (Pontedeume)
  • Asociación Ecoloxista Arco Iris
  • Asociación ecoloxista Naturviva
  • Asociación Española para la Recuperación, Conservación y Estudio del Gusano de Seda Autóctono
  • Asociación Galega de Amigos do Camiño de Santiago (AGACS)
  • Asociación Galega de Apicultura (AGA)
  • Asociación Galega de Custodia do Territorio (AGCT)
  • Asociación Galega de Horticultura Urbana
  • Asociación Micolóxica Pan de Raposo (Cee)
  • Asociación Motivos d'Aldea (Bueu)
  • Asociación Neria
  • Asociación para a Defensa Ecolóxica de Galiza (ADEGA)
  • Asociación Pro Enfermos Mentales (APEM)
  • Asociación Profesional do Sector Turístico da Costa da Morte (APTCM)
  • Asociación Socio-Cultural O Iríbio (Triacastela)
  • Asociación Veciñal do Saviñao (Lugo)
  • Asociación Xuvenil para o Estudo da Natureza (AXENA)
  • Associaçom Galega da Língua
  • Banco de Tempo Fervello
  • Bloque Nacionalista Galego
  • Cántigas da Terra
  • CCOO
  • Charanga Tabernícolas do Leiradal
  • Club de Montaña e Escalada Azimut
  • Club Montañeiros Celtas
  • Clube Espeleolóxico Máuxo (CEM)
  • Colectivo Ecoloxista do Salnés (CES)
  • Colectivo Nacionalista de Marín
  • Colectivo Urbano Lugrís
  • Colexio Oficial de Veterninarios da Coruña
  • Comités
  • Comunidade de Montes de Caldebarcos
  • Confederación Intersindical Galega (CIG)
  • Confraría de Pescadores de Lira
  • Confraría de Pescadores do Pindo
  • Cooperativa de Agricultura Ecolóxica Rainha Lupa (Quilmas)
  • CostaMeiga.com
  • Ecogalego.org
  • Encontro Irmandiño
  • Federación Ecoloxista Galega (FEG)
  • Finisterrae
  • Foro Social de Cangas
  • FRUGA (Federación Rural Galega)
  • Fundación Gonzalo López Abente (Muxía)
  • Fundación para o Avance Científico da Veterinaria en Galicia (ACIVEGA)
  • Fundación Sen Esquencer
  • Galinus, Taller de Novos Medios
  • Galiza non se vende
  • Galiza Nova
  • Indicación Xeográfica Protexida Castaña de Galicia
  • Instituto Galego de Estudos Célticos (IGEC)
  • Instituto Universitario de Xeoloxía Parga Pondal
  • Lonxanet
  • Luar na Lubre
  • Organización Galega de Comunidades de Montes Veciñais en Man Común (ORGACCMM)
  • Parque Natural de la Breña y Marismas de Barbate (Cádiz)
  • Partido da Terra
  • Pensión Rústica A Laxe
  • Permacultura Eiras do Minho
  • Plataforma en Defensa dos Montes do Morrazo
  • Plataforma Pola Defensa da Ría de Vigo CÍES
  • Plataforma pola defensa da Serra do Galiñeiro
  • Plataforma pola defensa de Quilmas (Quilmas)
  • Plataforma pola defensa do Xallas (Costa da Morte)
  • Plataforma Salvemos Cabana
  • Proxecto Mar de Lira
  • Proxecto Pindo Mariño
  • PSdeG-PSOE
  • Real Academia Galega
  • Salvemos Monteferro
  • Sociedade Galega de Historia Natural (SGHN)
  • Sociedade Galega de Ornitoloxía
  • UGT
  • Verdegaia
  • Xurde Caldebarcos (Caldebarcos)
  • Zocamiñoca

ACTIVIDADES

Charlas, presentacións públicas, etc.

  • 13 de novembro de 2010 en Carnota. Presentación pública da Asociación con Xilberto Caamaño Beiro, presidente da Asociación Monte Pindo Parque Natural, Martiño-Fiz López Lindoso, biólogo e relator da iniciativa "Monte Pindo Parque Natural", Fins Eirexas Santamaría, xeólogo e secretario executivo de ADEGA, Juan Ramón Vidal Romaní, xeólogo e director do Instituto Universitario de Xeoloxía Isidro Parga Pondal (UDC)
  • 20 de agosto de 2011 no Pindo. I Simposium Monte Pindo coa participación, entre outros, de Maribel Longueira, Juan Ramón Vidal Romaní, Xosé Manuel Lobato, Martiño-Fiz López LindosoFins EirexasFrancisco Xosé Fernández Naval.
  • 3 de decembro de 2011 en Caldebarcos. II Simposium Monte Pindo coa participación, entre outros, de César Cambeiro, Margarita Miguens Busto, Xosé Manuel Lobato, Moisés Asensi Cabirta, Andrés López Romero, Xoán Ramón Vidal Romaní.

Roteiros

  • Roteiro aberto desde o Fieiro (30 de xaneiro de 2011).
  • Roteiro aberto e de limpeza do camiño á Pedra Cabalgada (16 de abril de 2011).
  • Colaboración cun roteiro polo Río Xallas (29 de maio de 2011).
  • Roteiro aberto e de limpeza do camiño Chan das Lamas - Braña dos Aguillóns (6 de agosto de 2011).
  • Roteiro aberto e de limpeza do camiño San Cibrán - Chan das Lamas (15 de outubro de 2011).
  • Roteiro circular polo Monte Pindo “para non perderse”, co gallo do recente extravío de varios mozos na zona. Éxito sen precedentes pois asistiron máis de 200 persoas (22 de setembro de 2012)
Ademais guiamos polo  monte os seguintes colectivos: Asociación de Veciños de Monte Alto, Torre de Hércules e Atocha, Asociación Palavea Bravú, Asociación de Veciños Os Castros de Pontedeume e ADEGA, entre outras.

Denuncia

  • Denunciamos publicamente a pretensión da Xunta de cercar o Monte Pindo mediante a ampliación dos 3 parques eólicos máis cercanos.
  • Denunciamos publicamente a pretensión do Concello de Carnota de valar o Monte Pindo e crear nel un coto de caza maior pechado a veciños e visitantes durante parte do ano. 
  • Lanzamento dunha campaña de fotodenuncia sobre as pintadas e gravados nas pedras do Monte Pindo, sensibilizando á poboación sobre esta grave problemática. Denuncia ante o SEPRONA por estes feitos.
  • Denunciamos publicamente a plantación deliberada de Cortaderia selloana (máis coñecida coma plumachos ou Herba da Pampa) na Área Recreativa do Fieiro.
  • Denunciamos ao SEPRONA a subida ilegal de motos e quads ao Monte Pindo.
  • Denunciamos ao SEPRONA a instalación dunha área recreativa no Campo de Cortes asi como o expolio arqueolóxico nun lugar de especial sensibilidade por dúas razóns: alí están depositados os restos dunha ermida e é o hábitat dunha especie vexetal única e en perigo.
  • Presentamos alegacións contra o proxecto de ampliación do Parque Eólico Outes-Mazaricos.
  • 17 de decembro de 2010. A xustiza obriga a respectar o caudal mínimo do Río Xallas. Malia que cando se presentou a denuncia contra a seca do río nós nin existíamos como colectivo, e fixérao o colectivo Ríos con Vida a instancias de ADEGA, no momento de facerse efectiva a apertura foi a nosa asociación quen tivo que asumir o protagonismo público e reivindicativo sobre esta cuestión e facer as valoracións precisas.
  • 6 de setembro de 2011. Denunciamos publicamente e ante o SEPRONA a agresión con pintura á excomuñón de Penafiel.

Investigación cultural, patrimonial, natural, etc.

  • Divulgación da cuestión da cabra autóctona do Monte Pindo, extinta a mediados do século XX.
  • Colaboración con ADEGA para o inventariado do Carballo Anano no Monte Pindo e trámites para a súa inclusión exitosa no Catálogo Galego de Especies Ameazadas coa categoría de Vulnerable.
  • Colaboración coa UDC para a localización da especie Iris boissieri (lirio de monte) que se detectou por última vez no ano 2006. Chamamento público a que os visitantes comuniquen se a localizan.
  • Colaboración con diversos colectivos micolóxicos para catalogar as especies presentes no Monte Pindo.
  • Divulgación de que as liñas de murallas que aparecían semiderrubadas en diferentes pasos no entorno da Laxe da Moa gardaban unha lóxica en forma de Castella Tuttiora (lugar seguro de refuxio dos nosos antergos) que rodeaban os pasos de toda a plataforma e que poderían datar do século V ou VI.
  • Divulgación do pouco coñecido “voo americano”, unha ortofoto aérea feita polo exército americano retratando en toda a súa extensión o Concello de Carnota tal e como era no ano 1956.
  • Divulgación da frustrada visita do xeólogo Guillermo Schultz ao Monte Pindo en 1832.
  • Divulgación do dato de que as análises de tellas recollidas no Monte Pindo demostran a súa utilización continuada desde a época romana.
  • Divulgación do suposto petroglifo ignoto documentado por Xosé Barreiro Barral no Monte Pindo cuxo motivo sería unha estraña “dobre espiral”.
  • Divulgación do dato de que hai máis de mil anos Carnota era o nome da comarca e o Monte Pindo era considerado monte sacro.
  • Divulgación dun estudo sobre os diferentes nomes que o Monte Pindo tivo ao longo dos séculos.
  • Colaboración no achado dunha nova fortificación no veciño monte de Lira, que desembocou no célebre Proxecto Torre dos Mouros co cal colaboramos en todas as súas fases.
  • Colaboración no libro “Máxico Tear Natural” do escritor e socio Xosé Lobato, editada por Alvarellos, que nos deixou exemplares a metade de prezo para axudar a financiarnos.
  • Divulgación dos orixinais inéditos dunha estraña poesía en alemán escrita por Vicente Risco e Ramón Otero Pedrayo durante unha visita ao Monte Pindo un mes antes do estoupido da Guerra Civil.
  • Divulgación dun estudo sobre a toponimia do río Xallas a través da historia.
  • Investigación e divulgación de datos históricos sobre o desaparecido Castelo de Penafiel e simulación do seu aspecto orixinal.
  • Achado dunha inscrición en latín que pode tratarse da data fundacional da Capela de Campo de Cortes.
  • Achado dunha pedra de lapislázuli no entorno do Castelo de San Xurxo.
  • Achado dunha moeda (óbolo de vellón da ceca da Coruña) de Afonso X no Campo de Cortes.
  • Lanzamento dunha campaña de subscrición popular para reunir nun só volume a maior parte da poesía escrita sobre o Monte Pindo con achegas inéditas de ducias de autores contemporáneos. Conseguimos o financiamento en só 2 semanas e o libro editarase a primeiros do ano 2013.

Outras actividades de promoción e divulgación

  • Participación cun stand propio nas sucesivas edicións do Mercado Ecolóxico de Quilmas.
  • Participación cun stand propio no Festigal 2011.
  • Participación cun stand propio na I Feira de Promoción Local de Carnota 2012 (Víndemo Ver).
  • Participación cunha conferencia na Feira Ecolóxica Terractiva de Arzúa.
  • Divulgación do dato inédito de que a II República valorara declarar o Monte Pindo como Parque Nacional no ano 1917, e que non chegara a realizarse pola inestabilidade política que inmediatamente de desenvolvera na Península.
  • Gravación dun episodio de “MOBilízate” (V Television) cun orixinal Flashmob colaborativo que reuniu 222 achegas dos cidadáns de toda Galiza e do resto do mundo (Cuba, Bruxelas, etc).
  • Gravación do episodio piloto para unha serie televisiva chamada “Sendeiros ocultos” (dirixida por Andrés López Romero) e colaboración con diversas filmacións para CRTVG, V Televisión e varias produtoras independentes.
  • Ducias de entrevistas en prensa, radio e televisión sobre os obxectivos e actividades do noso colectivo.
  • Centos de reportaxes, publicacións e artigos nos medios de comunicación sobre os obxectivos e actividades do noso colectivo.
  • Importante campaña de axitación en internet ata conseguirmos que o LIC Carnota-Monte Pindo se erixira na marabilla natural galega preferida dos internautas galegos no concurso “Marabillas Naturais de Galicia” patrocinada por varias entidades públicas e privadas, malia que finalmente o premio nunca chegou a fallarse levantando sospeitas de fraude que chegaron ao Parlamento Galego.
  • Consecución de que a exposición Gallaecia Petrea (inaugural da Cidade da Cultura) primase o Monte Pindo coma un dos espazos máis destacados da nosa xeografía.
  • 17 de marzo de 2012. Irmanamento co barrio coruñés de Monte Alto, presentado por Xurxo Souto, amenizado por música tradicional e que rematou coa plantación dun carballo no Campo de Marte por parte de colectivos da cidade. Colaboraron a AAVV Monte Alto e o Concello da Coruña.
  • Colaboración cos nenos e nenas do IES Maximino Romero de Lema de Zas para a elaboración dun docu-informativo titulado “Terra, mar e xente” sobre o macizo e a reivindicación.

Reivindicación e medidas de presión

  • 1 de xaneiro de 2012. Lanzamento dunha campaña en Internet para presionar á Xunta a efectivizar a declaración mediante o envío masivo de correos electrónicos á sede da Consellería de Medio Ambiente, que rematou con máis de 2.100 participantes.
  • 2 de febreiro de 2012. A Comisión 7ª do Parlamento Galego debate, a instancias do noso colectivo, a proposta de declarar o Monte Pindo como Parque Natural, que contou co apoio da oposición e o rexeitamento da Xunta.
  • 3 de febreiro de 2012. Rolda de prensa da nosa Asociación na Galería Sargadelos en Santiago, na compaña do alcalde de Carnota e o portavoz de ADEGA, valorando a nova negativa da Xunta a declarar o Parque Natural e convocando unha Manifestación Nacional.
  • 23 de febreiro de 2012. Reunión en San Caetano co conselleiro responsábel da declaración, Agustín Hernández, que se valorou como moi positiva e serviu para achegar posturas máis que non conseguiu arrincar da Xunta un compromiso firme sostido en prazos e investimentos para levar a cabo a declaración.
  • 14 de abril de 2012. Manifestación Nacional con saída no Ézaro e remate na Praza da Solaina, e que malia as terríbeis condicións meteorolóxicas contou con medio milleiro de participantes volcados na demanda cidadá.
  • Proxección internacional da nosa reivindicación mediante a presenza no remate da Vuelta Ciclista 2012 no Mirador do Ézaro, con pintadas na estrada, faixas durante a subida e unha faixa xigante no Penafiel co noso lema.
  • Proxección da nosa reivindicación nas proximidades dos distintos procesos electorais, estimulando que as diferentes forzas políticas comprometeran o proxecto para declarar o Parque Natural nos seus programas electorais así como que este debate estivese presente en campaña.
  • 30 de outubro de 2012. Denuncia pública de que a Xunta leva 10 anos sen declarar nin un só novo Parque Natural, primando outras figuras coma a Rede Natura cuxa repercusión non se considerou demasiado positiva

30/10/12

Cúmprense 10 anos sen ningún novo parque natural galego

Este ano cumpriuse unha década sen que a Xunta de Galicia, organismo depositario desta competencia, declare ningún novo Parque Natural na nosa comunidade.

Naquela altura do 2002, o DOG informou que o Conselleiro de Medio Ambiente, José Carlos del Álamo Jiménez, estabeleciu un réxime xurídico especial para o espacio denominado Serra da Enciña da Lastra, mediante a súa declaración como parque natural.. Noutras palabras, declarou o Parque Natural da Serra da Enciña da Lastra. O precioso espazo natural fronteirizo sito en Rubiá (Ourense), que atendendo a lenda debe o seu nome a unha enorme enciña que serviría de guía aos camiñantes, convertíase asi no sexto -e ata hoxe último- Parque Natural galego.

Carlos del Álamo
Neste tempo moitas cousas cambiaron. 3 presidentes pasaron pola Xunta e moitos máis conselleiros sen que ningunha outra zona de interese medioambiental da nosa xeografía fose atendida mediante o emprego da figura de protección máis coñecida e recoñecida das que existen, ademais de ser das poucas que obrigan a comprometer un orzamento anual. Mentras tanto, a Rede Natura 2000 espallábase ás súas anchas, impoñéndose por decreto nas principais áreas naturais do noso País. Pero isto non significou ningunha mellora fóra do papel. Aínda hai poucas semanas o alcalde de Carnota, Ramón Noceda, expresábao con contundencia: "Na Rede Natura os veciños non poden decidir nin opinar sobre o que se pode facer ou non nos espazos naturais". Pola contra, Noceda valoraba que a declaración do Parque Natural "non suporá máis restriccións para os veciños senón ao contrario: permitirá consensuar entre todos os sectores os usos que debe ou non debe ter o Monte Pindo".

Carnota é o segundo concello costeiro galego con máis superficie protexida, cun impresionante 42% da superficie total do municipio. Mais efectivamente esta protección trouxo poucas ou ningunha vantaxe e si moitas trabas tanto para a administración local coma para os veciños á hora de sacar adiante proxectos e mesmo para continuar cos aproveitamentos que tradicionalmente se viñan desenvolvendo neses espazos. Esta é precisamente unha situación que se pretende invertir coa declaración do Monte Pindo como Parque Natural, unha figura que si obriga a investimentos reais e a constituir órganos de diálogo e consulta con todas as partes, dando prioridade máxima tanto á sociedade civil coma ao tecido económico que deben ser os primeiros beneficiarios desa protección.

A consigna é clara: En Carnota, e na Costa da Morte, temos un medio ambiente privilexiado e temos que protexelo, pero esta protección debe repercutir positivamente nas vidas dos seus veciños, na creación de emprego e na fixación poboacional. E un Parque Natural do Monte Pindo ben xestionado do que todos e todas nos sintamos partícipes e beneficiarios é o camiño para logralo.

26/10/12

Os nomes do monte sacro dos nosos antergos

A toponimia do Olimpo Celta, á vez que riquísima e espectacular, constitúe un dos maiores debates abertos na actualidade en torno a este monte. A tradición oral e as abondosas referencias literarias que conservamos permítennos chamarlle ao macizo carnotán de múltiples formas, case todas igual de lexítimas. Porén, uns poucos son os nomes que como norma xeral se empregan para ubicar esta fermosa serra nos mapas xeográficos. Sen pretender pasar esta reflexión por un tratado irrefutábel, coa humildade que se lle debe presumir ao noso colectivo e coas portas abertas a toda achega dos nosos visitantes mesmo para identificar erros nesta visión, imos tentar explicar de onde proceden.

Monte Pindo
Este é sen dúbida o nome máis empregado para este macizo, e a historia, tradición oral e literaria avala esta denominación como a máis antiga da que teñamos constancia fidedigna.
A primeira referencia documental clara e incuestionábel parece saír da pluma do Padre Sarmiento, que no ano 1745 describiu o macizo na súa obra «Viaxe a Galicia» referíndose sempre e inequívocamente a el como "Monte Pindo".
Medio século antes a literatura galega xa empregara este topónimo de xeito máis xenérico.
Monte Pindo na Carta Xeométrica de Galiza (1837)
Ese é tamén o topónimo que aparece na Carta Xeométrica de Galiza que Domingo Fontán rematou en 1837, o primeiro mapa da nosa historia feito con precisión matemática.
Máis recentemente comezan a aparecer outras variantes coma Monte, Montes ou Serra do Pindo, e ocasionalmente aparece Pindo a secas.
Outro indicio que suxire -pero non proba- que o nome común do macizo pode ser moi anterior está na referencia máis antiga que coñecemos do topónimo Carnota, do ano 830: «in Carnota ecclesia Pintani in Sentes», traducíbel como «En Carnota (está a) igrexa do Pindo nos espiños». Esta pode ser a primeira e cecáis única referencia escrita á ermida ignota do Campo de Cortes, cuxos restos parecen desafiar a propia historia.

Moitos consideraron que o Monte Pindo debe o nome ao parecido co seu homónimo grego.
O significado da palabra Pindo está en discusión, e é difícil afirmar categoricamente de que palabra ou de que idioma procede. Para algúns pode proceder do vocablo latino pinētum, que significa piñeiral, aínda que en ningunha época da historia pareceu destacar pola masiva presenza desta especie vexetal. Para outros, pode compartir raíz etimolóxica con empinado, escarpado, ou significar penedo aillado, ou incluso almena (do latín pinna). Para outros, o nome débese á súa similitude co Monte Pindo grego (Πίνδος). É unha interpretación que por si mesmo xustificaba para numerosos helenistas unha marcada influencia grega e fenicia sobre os nosos antepasados. Aínda que tampouco se pode descartar que a procedencia sexa previa á romanización, celta ou mesmo anterior.
Non temos datos nin tampouco interese en desbotar calquera destas interpretacións, xa que cada unha delas contribuiu a enriquecer e agrandar a propia lenda do Monte Pindo.

Olimpo Celta
Ramón Otero Pedrayo
O segundo nome máis coñecido xurdiu no ano 1926 coma unha licenza poética que chegou para quedarse. É sobradamente coñecido que Ramón Otero Pedrayo é o creador deste nome co que moitísimos identifican hoxe o Monte Pindo. Foi na súa obra Guía de Galicia. O máis curioso é que parece que Otero Pedrayo nunca chegou a escribir "Olimpo Celta". A cita exacta que empregou é: «Se le ha llamado uno de los olimpos célticos de Galicia y es, en verdad, uno de los más bellos montes litorales de ella». Esta referencia reproduciuse varias veces en obras e prensa da época, pero non foi ata 50 anos despois, cando Xosé Barreiro Barral publicou a súa obra «Montes del Pindo: Olimpo celta y desierto de piedra», que se popularizou este topónimo.
Sen dúbida Pedrayo nunca imaxinou a trascendencia que case un século despois tería esta frase do seu libro, e moito menos que bautizaría o macizo granítico carnotán.
Olimpo Celta tamén existe como microtopónimo dentro do propio Monte Pindo. Asi se lle chama á fermosa vagoada que une o Castelo de San Xurxo co lugar do Pindo, rodeada de todo tipo de figuras graníticas que non deixan de espertar a imaxinación do que pasa. É difícil saber se este microtopónimo é anterior á cita de Otero Pedrayo.

Pedregal
Un dos nomes que máis forza cobrou no último século na tradición oral é o substantivo de rexistro popular Pedregal (que polo fenómeno da gheada imperante na comunidade local, pronúnciase Pedreghal). A primeira vez que aparece esta palabra nos diccionarios parece datar do ano 1958, cando Eladio Rodríguez González a recolle no seu Diccionario enciclopédico gallego-castellano coa acepción «sitio ou terreo cuberto case todo de pedra miúda». Na documentación esta palabra aparece no século XIX como apelido e tamén como topónimo na bisbarra de Trasancos, mais nunca referíndose ao macizo carnotán.

Monte Sacro
No Tombo de Celanova aparece esta cita datada no ano 934: «In Carinota [...], cum suo monte sacro»: Literalmente, «en Carnota, co seu monte sacro». Tal e como aparece escrito, atestigua claramente a súa importancia relixiosa, probabelmente precristiá, que seguía sendo moi notábel na época.


Alfoz de Muros
Non sendo un topónimo propiamente dito, á altura das revoltas irmandiñas de 1467 o nome xenérico utilizado para ubicar este macizo carnotán é "Alfoz de Muros". E dicimos xenérico porque este substantivo de orixe árabe significa «zona rural dependente dunha vila maior». É dicir, Muros daquela gañara certo protagonismo como entidade urbana e as zonas rurais das súas inmediacións formaban parte da súa área de influencia. No preito Tabera-Fonseca, á hora de tentar dilucidar quen foran os responsábeis do asalto e destrución do Castelo de Penafiel, en todo momento sitúano vagamente no alfoz de Muros ou ben na desembocadura do río Xallas, sen precisar un topónimo específico para designar o monte.

Discutíbel: Carnota
É posíbel que o nome da antiga comarca, hoxe concello, Carnota, proceda da raíz celta Carn, que significa pedra, e o sufixo ota, que quere dicir alta. Con toda seguridade, esa pedra alta que caracteriza a zona é o Monte Pindo. Porén, non está probado que o monte se chamase Carnota en ningún momento da historia.
En todas as referencias antigas analisadas, Carnota e as súas variantes (Carinota, Karnota, Cornatum...), dan nome a un territorio máis ou menos amplo situado ao sur do río Xallas, que chegou a abarcar ata o Tambre. De feito, a raza que ocupaba este territorio eran os Celtici Supertamarci, que significa «Célticos por enriba do Tambre», igual que na outra beira moraban os Praestamarci.
Todas as referencias a un monte importante nesta zona sitúano sempre dentro do territorio de Carnota, máis non coñecemos ningún "monte Carnota" na zona. Polo tanto, na nosa opinión carece de fundamento asegurar nalgún momento da historia foi o seu nome.
Porén, si existiu ou existe un monte Carnota no entorno de Betanzos e outro no concello de Vedra.

E que pasa no resto da historia?
Calquera lector mínimamente atento percibiría dous inmensos baleiros temporais dos cales non falamos.
Como se chamou o Monte Pindo ata o século IX? E como se lle chamou entre os séculos X e XVIII?
A primeira pregunta non podemos respondela. O nome do monte ata o medievo, se o tivo, é un completo enigma, e de dar un nome sería pura especulación, aínda que hai unha posibilidade que sinceiramente nos conmociona e que a calquera persoa interesada na historia galega prerromana lle caerá de caixón.
A partir da época medieval, é probábel que a inmensa importancia estratéxica que tivo o Monte Pindo nas tramas monárquicas, nobres e eclesiásticas da Galiza medieval fixeron que o nome e a gloria do macizo ficase eclipsada pola dos seus castelos de San Xurxo e Penafiel, que si aparecen citados milleiros de veces en todo tipo de documentos, mais nunca o topónimo do monte que os acobillaba. Só a caída definitiva do último que quedaba en pe (Penafiel) durante as revoltas irmandiñas, suxire que o nome do monte debía estar ata esquecido, pois para se referiren á área onde se asentaban estas fortificacións malogradas empregaban xenericamente «alfoz de Muros». Desde esa época, ata a pruma de Sarmiento, coñecemos moi poucas pistas fidedignas.

Existe outra posibilidade, cecáis máis aventurada e riscosa, pero que tampouco temos probas para desbotar: Que o nome verdadeiro do monte sacro dos nosos antergos aínda esté por descubrir. E que a lenda continúa.

23/10/12

A Antoloxía Poética do Monte Pindo xa é unha realidade grazas a vós

Grazas!

A campaña para editar a Antoloxía Poética do Monte Pindo mediante a fórmula da subscrición popular só pode calificarse de completo e rotundísimo éxito, acadando en menos de dúas semanas os 1.050 euros que aspirábamos a recadar en case dous meses.

Se non o conseguíamos nes prazo veríamonos na obriga de suspender o proxecto e reintegrar as achegas a todos os amigos e as amigas que colaboraran ata o momento.Pero nunca nos defraudástedes, e esta vez non ía ser distinto.

A día de hoxe podemos anunciar aos nosos amigos e visitantes, e moi nomeadamente aos nosos 59 subscritores populares ata o momento, que a Antoloxía Poetica xa é unha realidade. Se este éxito foi posíbel é unica e exclusivamente grazas ao voso inmenso apoio desde o primeiro momento, que nos levou a batir un récord na plataforma Goteo.org, o que mereceu unha mensaxe de felicitación de Enric Senabre, responsábel de proxectos e comunidade da plataforma:

Ha sido una campaña muy rápida, de las más veloces en llegar al mínimo, felicidades por vuestra comunidad!
Enric Senabre Fidalgo, cofundador de Goteo.org
Esta mesma semana, a Asociación Monte Pindo Parque Natural e os coordenadores da Antoloxía Poética do Monte Pindo, Francisco X. Fernández Naval e Miro Villar, poranse en contacto con Edicións Toxosoutos, que é a que se vai facer cargo da edición, para darlle a boa noticia. Estimamos que a obra estará rematada e lista para entregar a todos os colaboradores en xaneiro ou febreiro de 2013, dado que o proceso editorial é bastante longo e aínda queda moito por facer.

Non obstante, a Asociación Monte Pindo Parque Natural vai manter habilitada a campaña en Goteo.org, dado que aínda que o obxectivo xa esté acadado, é unha excelente forma de facerse cun exemplar a un custe moito máis económico do que terá nas librarías. Ademais o nome da persoa subscritora (ou quen esta desexe) aparecerá recollido na páxina de Agradecementos da obra.

Lembramos que as subscricións pódense facer ata o 19 de novembro aboando 10 euros por exemplar por estes medios:
  • Por tarxeta de crédito ou PayPal no noso espazo en Goteo.org
  • Por transferencia á conta da Asociación Monte Pindo Parque Natural: 2080-0025-43-3040001120 (Novagalicia Banco)
Grazas a todos e todas por converter este soño nunha realidade. Sodes incríbeis!

19/10/12

O 21 de outubro, Galiza decide: Parque natural, XA!

O Parque Natural do Monte Pindo estivo presente nas
mensaxes dalgúns candidatos durante esta campaña
Faltan horas para decidir o destino de Galiza durante os vindeiros 4 anos, e as diferentes candidaturas exprimen as derradeiras horas antes da xornada de reflexión tratando de convencer aos indecisos coas últimas mensaxes a favor da continuidade na acción do goberno ou ben por un cambio de goberno da Xunta.

A Asociación Monte Pindo Parque Natural non é en absoluto allea a este proceso, pois a declaración do Monte Pindo como Parque Natural, o noso leit motiv, tamén se xoga o 21 de outubro: a Xunta de Galiza é a institución coas competencias exclusivas para efectivizala ou non.

Por iso a Asociación Monte Pindo Parque Natural fai un chamamento a un voto crítico pensando tamén no futuro do Olimpo Celta e do seu entorno. Para dar suficientes elementos de xuízo analisamos as propostas de todos os partidos políticos sobre o Olimpo Celta en particular e sobre o medio ambiente galego en xeral, especialmente no referido aos espazos naturais protexidos. Ao Xigante da Mina tamén lle afecta o que votemos o domingo!

Partido Popular (PP)
  • Candidato á Xunta: Alberto Núñez Feijóo (Ourense)
  • Candidato máis cercano: Nº 15. María de la Soledad Piñeiro Martínez (Carnota)
  • Resultados no 2009: 789.427 votos (38 escanos)
  • Apoiou antes desta campaña a declaración do Monte Pindo como Parque Natural? Non. Malia que persoas do PP con responsabilidade nesta materia recoñeceron en privado a membros da Asociación a necesidade de declarar este espazo como Parque Natural, en público o PP nunca se significou a favor e de feito chegou a empregar a súa representatividade no Parlamento para frear os intentos da oposición para que se declarara o Monte Pindo como Parque Natural.(ver video)
  • Comprometeuse nesta campaña a declarar o Monte Pindo como Parque Natural? Non.
  • Que di dos espazos naturais protexidos no seu programa electoral? No relativo aos espazos naturais galegos no programa do PP destacamos as seguintes medidas: Ampliación da Rede Natura 2000. Ampliación do Plan Reitor de Uso e Xestión do Parque Nacional das Illas Atlánticas e unha nova orientación do seu uso público. Aprobación e implementación dos plans de acción das Reservas da Biosfera. 3. Dotación da Rede de Espazos Naturais dos correspondentes Plans de Ordenación dos Recursos Naturais que permitirán organizar dun xeito sostible a conservacións dos recursos e valores naturais cos usos do solo e o correcto desenvolvemento das actividades humanas. Elaboración do Plan de xestión de humedais de importancia internacional RAMSAR. Plan estratéxico director para a optimización socioeconómica das áreas de influencia dos parques naturais de Galicia.

Partido Socialista Obrero Español (PSdeG-PSOE)
  • Candidato á Xunta: Manuel Vázquez Fernández (O Carballiño, Ourense)
  • Candidato máis cercano: Nº 1. Francisco Caamaño Domínguez (Cee, con ascendencia carnotá)
  • Resultados no 2009: 524.488 votos (25 escanos)
  • Apoiou antes desta campaña a declaración do Monte Pindo como Parque Natural? Si.
  • Comprometeuse nesta campaña a declarar o Monte Pindo como Parque Natural? Non.
  • Que di dos espazos naturais protexidos no seu programa electoral? O programa do PSdeG conta cun apartado dedicado aos espazos naturais protexidos, do que destacamos: "E necesario ampliar a rede de espazos protexidos, recuperando a proposta de chegar ao 18% do territorio protexido pola Rede Natura 2000. Na mesma liña, establecemos máis mecanismos de “custodia do territorio”. Queremos comprometer a creación do Parque Natural Ancares- Courel, entre outras figuras de protección."
Bloque Nacionalista Galego (BNG)
  • Candidato á Xunta: Francisco Jorquera Caselas (Coruña)
  • Candidato máis cercano: Nº 10. Modesto Fraga Moure (Fisterra)
  • Resultados no 2009: 270.712 votos (12 escanos)
  • Apoiou antes desta campaña a declaración do Monte Pindo como Parque Natural? Si.
  • Comprometeuse nesta campaña a declarar o Monte Pindo como Parque Natural? Si, tanto no seu programa como na reunión celebrada coa nosa entidade.
  • Que di dos espazos naturais protexidos no seu programa electoral? O programa electoral do BNG conta cun apartado dedicado aos espazos naturais, coas seguintes iniciativas: "Elaboración unha nova política de xestión dos Espazos Naturais Protexidos (ENP) que teña como eixos vertebrais a súa ampliación, a conservación e a restauración dos seus valores naturais, a participación dos residentes e a elaboración de plans de uso de xestión e de desenvolvemento económico sustentábel, en beneficio da poboación residente.Ampliación da Rede Natura, especialmente en lugares singulares como o a inclusión da Serra do Galiñeiro no Parque Natural do Aloia. Avaliación do estado de conservación da Rede Natura e desenvolvemento de actuacións para restaurar zonas deterioradas. Ampliación territorial do Parque Nacional das Illas Atlánticas e definición de novos plans de uso e xestión, así como o impulso dunha política que permita que a totalidade das illas galegas sexan de titularidade pública. Declaración do Monte Pindo como Parque Natural."
Partidos políticos extraparlamentarios Alternativa Galega de Esquerda (AGE)
  • Candidato á Xunta: Xosé Manuel Beiras Torrado (Compostela)
  • Candidato máis cercano: Non consta ningún da zona da Costa da Morte.
  • Resultados no 2009: Non participou.
  • Apoiou antes desta campaña a declaración do Monte Pindo como Parque Natural? Non. Si o fixeron por separado dúas das organizacións que conforman a coalición, EQUO e EI.
  • Comprometeuse nesta campaña a declarar o Monte Pindo como Parque Natural? Non.
  • Que di dos espazos naturais protexidos no seu programa electoral? O seu escueto programa non ten ningunha referencia a cuestións relativas ao medio ambiente.
    • Candidato á Xunta: Xoán Carlos Bascuas Jardón (Rüsselsheim, Alemaña)
    • Candidato máis cercano: Nº 9. Daniel Oca González (Cee)
    • Resultados no 2009: Non participou.
    • Apoiou antes desta campaña a declaración do Monte Pindo como Parque Natural? Non.
    • Comprometeuse nesta campaña a declarar o Monte Pindo como Parque Natural? Si, mediante unha mensaxe por Twitter.
    • Que di dos espazos naturais protexidos no seu programa electoral? Do programa electoral destacamos o seguinte apartado: "Ampliar a cativa rede de parques naturais (comezando pola declaración do Macizo Central Ourensán, Os Ancares e O Courel, no primeiro ano da lexislatura) garantindo os medios adecuados para a súa xestión e ampliar o Parque Nacional das Illas Atlánticas. É imprescindible a creación de liñas de axuda económica (subvencións, créditos brandos, desgravacións fiscais na cota autonómica) para o desenvolvemento sustentábel nos espazos da Rede Natura 2000, así como un programa de adquisición de terreo de especial interese natural, aberto á colaboración/participación de particulares e asociacións."
    Unión Progreso y Democracia (UPyD)
    • Candidato á Xunta: José Canedo Santos (Val do Dubra)
    • Candidato máis cercano: Non consta ningún da zona da Costa da Morte.
    • Resultados no 2009: 23.796 votos (0 escanos)
    • Apoiou antes desta campaña a declaración do Monte Pindo como Parque Natural? Non consta.
    • Comprometeuse nesta campaña a declarar o Monte Pindo como Parque Natural? Non.
    • Que di dos espazos naturais protexidos no seu programa electoral? O programa electoral conta coa seguinte proposta: "Revisión de los planes de ordenación de los espacios naturales protegidos, así como la ampliación de la Red Natura 2000."
    Outras
    Existen formacións políticas sectoriais ou locais que xa se teñen apoiado a declaración do Monte Pindo como Parque Natural, e que sería inxusto obviar neste artigo: Partido da Terra e Colectivo Nacionalista de Marín.

    16/10/12

    A subscrición popular da Antoloxía supera o seu ecuador a só 5 días do seu lanzamento

    O éxito da iniciativa para publicar unha Antoloxía Poética sobre o Monte Pindo mediante a fórmula da subscrición popular foi inmediato e incontestábel. Malia que se preveran dous meses de prazo máximo, a só 5 días do lanzamento a campaña leva recadados máis do 50% dos 1.050 euros que como mínimo precisamos para ordenar que a editorial se poña en marcha.

    Por outra parte, a Asociación Monte Pindo Parque Natural leva recibido unha avalancha de mensaxes de persoas que desexan colaborar e non poden por non dispor de tarxeta de crédito nin de conta PayPal, os únicos métodos previstos ata o momento para subscribir a Antoloxía. É por iso que, en adiante, imos habilitar o ingreso a conta corrente para que a subscrición popular se poida facer dun xeito moito máis fácil e accesíbel. Os datos para facer o ingreso son os que seguen:
    Nº de Conta: 2080-0025-43-3040001120
    Entidade: NovaGalicia Banco
    Destinatario: Asociación Monte Pindo Parque Natural (CIF: G-70280177)
    Nota: Se a túa entidade bancaria estabelece algún tipo de comisión, débese ter en conta á hora de facer o ingreso.

      Agardamos que continúe o bo ritmo de recadación na plataforma Goteo.org, onde xa hai dispoñíbel un muro agradecendo todas as colaboracións, de xeito que en moi poucos días poidamos darvos unha noticia moi importante para o Monte Pindo e a poesía galega. Moitísimas grazas a todos!

      11/10/12

      O BNG comprométese a crear o Parque Natural do Monte Pindo

      Merche Díaz, Ana Pontón, Modesto Fraga,
      Xilberto Caamaño e Ramón Noceda (Fonte: Propia)
      A anunciada xuntanza solicitada polo BNG coa nosa entidade desenvolveuse finalmente esta chuviosa mañá de xoves no local da nosa entidade no Pindo. Ao encontro asistiron a candidata nº 2 pola provincia da Coruña, Ana Pontón Mondelo, asi coma o candidato nº 10, o fisterrán Modesto Fraga Moure. Tamén quixo estar presente o alcalde de Carnota, Ramón Noceda Caamaño, mentras que pola Asociación Monte Pindo Parque Natural asistiu boa parte da directiva.

      O BNG inclúe a declaración no seu programa electoral
      Ana Pontón lembrou que o BNG xa trasladou a declaración ao debate do Parlamento nesta Lexislatura. Malia que naquel momento a proposta fóra rexeitada polo grupo maioritario, a candidata reiterou o compromiso decidido coa demanda social que leva ata no seu programa electoral (PDF, páx.29).

      Porén, os presentes coincidiron en que a declaración non é suficiente por si mesma, senón se acompaña dunha serie de estratexias e medidas que ademais de protección e divulgación dos valores naturais e patrimoniais, sirva para dinamizar a zona e xerar desenvolvemento económico, postos de traballo e en definitiva que repercuta no incremento da calidade de vida na poboación do seu entorno.

      Puxo como exemplos algunhas experiencias en Francia, onde se crearon planos de xestión participativos para potenciar estes espazos naturais, de xeito que hoxe son moi ben valorados polos cidadáns e ademais repercute en importantes investimentos nas áreas rurais.

      Mario Maceiras, Xilberto Caamaño, Ana Pontón,
      Merche Díaz e Ramón Noceda  (Fonte: Propia)
      Pola contra, os espazos naturais galegos que xa teñen a consideración de Parque Natural e outras figuras como Rede Natura non se viron acompañados con medidas da Xunta para o seu desenvolvemento e en moitos casos nin sequera contan co perceptivo Plan Rector de Uso e Xestión (PRUX). "Declaran o Parque Natural e quédase en iso", dixo Pontón, polo que entende que algúns cidadáns non percibiran estas experiencias coma positivas. "Cando comezou o proxecto de peatonalización do casco histórico de Pontevedra, tamén recibiu algunhas críticas. Pero hoxe ninguén o cuestiona".

      Ana Pontón denuncia o uso clientelar das restricións nos espazos naturais
      Neste extremo, Ana Pontón incluso vai máis alá, denunciando que o PP usou discrecionalmente as supostas restriccións que conleva protexer un espazo. Ilustrouno co exemplo de que nalgúns espazos naturais a Xunta impediu usos tradicionais como pode ser a explotación forestal sostible, mentras que noutros permitiu que se asentaran industrias contaminantes sen poñer ningunha traba, o que contravén o espíritu da conservación natural e demostra o uso clientelar que se vén facendo deste tipo de figuras.

      O BNG aposta por un modelo alternativo de xestión dos espazos naturais, dixo Ana Pontón, que sexa democrático, participativo e respecte os usos tradicionais do monte. No caso do Monte Pindo observa unha serie de potencialidades que o Parque Natural debe  aproveitar, como que non existen núcleos poboados no seu interior, nin tampouco explotacións industriais ou actividade económica algunha que choque co espíritu dun espazo natural protexido. Pola contra, considera que coa declaración de Parque Natural este monte ata agora abandonado convertirase nun completo revulsivo para toda a zona polo que debe ser unha aposta firme e de futuro.

      Ramón Noceda: "O parque natural non suporá máis restriccións que as que xa temos"
      O alcalde de Carnota, Ramón Noceda, asegurou que a declaración do Parque Natural non suporá máis restriccións para os veciños senón ao contrario: permitirá consensuar entre todos os sectores os usos que debe ou non debe ter o Monte Pindo, cousa que non pasa actualmente coa Rede Natura, na que os veciños non poden decidir nin opinar sobre o que se pode facer ou non nestes espazos naturais. Noceda tamén negou rotundamente que se a Xunta declara o Parque Natural do Monte Pindo vaia limitar nas inmediacións a construción de vivendas nin a posibilidade de facer reformas nas casas, como desde algúns sectores se estivo dicindo interesadamente.

      Xilberto Caamaño: "Se é para o Pindo hai crise, pero se é para Guadarrama non"
      Xilberto Caamaño, presidente da Asociación Monte Pindo Parque Natural, comentou que xa visitou a maioría dos parques naturais galegos e algúns do resto do Estado, e que viu moitísimas cousas positivas pero tamén algunhas negativas, polo que debemos tomar boa nota e tratar de que o Parque Natural do Monte Pindo conte coa participación do tecido veciñal, social e económico, para que se faga do xeito máis vantaxoso para todos os sectores da sociedade. Ademais lembrou que o PP (que no fondo está dacordo coa declaración) dixo que o Parque Natural do Monte Pindo ten que esperar tempos mellores, mentras que acaban de declarar como Parque Nacional a Serra de Guadarrama (Madrid), na que cabería 20 veces o macizo carnotán.

      A Asociación Monte Pindo Parque Natural agradece que a candidata nacionalista contara coa nosa entidade na súa axenda con motivo da vindeira cita electoral.