29/07/11

Os veciños dos barrios de Monte Alto e Palavea (A Coruña) queren o Parque Natural do Monte Pindo

Torre de Hércules, Patrimonio da Humanidade
Os apoios seguen chegando, incluso desde os sitios máis alonxados e a pares. Son agora os veciños de dous dos barrios máis populosos da cidade da Coruña os que se suman á declaración de Parque Natural para o Monte Pindo.

As directivas da Asociación de veciños Atocha, Monte Alto e Torre de Hércules asi como da ARCD Palavea Bravú acordaron trasladarnos os seus respectivos apoios ao Monte Pindo e axudarnos a difundir a nosa causa na capital provincial. Ademais xa están estudando organizar visitas dos seus asociados e asociadas a este cume máxico de 627 metros de altura a rentes do mar.

Estes novos apoios coinciden no tempo coa protección legal do Carballo Anano do Monte Pindo, un fito para o noso medio natural por verse traducida na garantía de futuro para esta especie que só pervive en certas partes do Olimpo Celta, e prodúcense xusto un ano despois da declaración da Torre de Hércules como Patrimonio da Humanidade.

Agardamos que o apoio destes dous importantes colectivos coruñeses sumen o seu ánimo e sorte á causa da protección e desenvolvemento do Monte Pindo carnotán, e saudamos a loable e intensa actividade social que veñen desenvolvendo nos seus respectivos barrios, e que podedes coñecer nas súas páxinas web.

27/07/11

O carballo anano xa está protexido a nivel legal

Case 4 anos despois, os esforzos de ADEGA cóbado con cóbado cos veciños de Carnota deu os seus froitos, e o carballo anano (Quercus lusitanica Lam) xa forma parte do Catálogo Galego de Especies Ameazadas* na categoría de vulnerable.

Esta iniciativa partiu dun intenso traballo de campo (na foto) desenvolvido ao longo do ano 2008 polo biólogo Martiño-Fiz López Lindoso (que tamén é relator da proposta de Parque Natural no Monte Pindo), que acompañado de varios veciños de Carnota subiron ao Monte Pindo para localizar as cepas do Carballo anano, comprobar o seu estado e tentar delimitar a súa densidade e extensión real, que sorpresivamente resultou ser maior á que podería agardarse sabendo que a poboación máis cercana está a 500 quilómetros de distancia.

A memoria técnica froito deste estudo polo que se solicita a inclusión do carballo do Monte Pindo no Catálogo presentouse ao Observatorio Galego da Biodiversidade o 6 de marzo de 2008. Mais non foi ata 7 meses despois, a finais de setembro, cando se reuniu o Observatorio para tratalo asunto, resolvendo apoiar esta iniciativa e trasladar a solicitude á Dirección Xeral de Conservación da Natureza, dependente da Consellería de Medio Ambiente da Xunta de Galicia, para a súa publicación no boletín oficial.

Foi aí cando comezou o calvario para o Carballo anano e os colectivos que buscamos a protección desta especie única en Galicia e escasa en Europa. Máis de 2 anos tardou en volver saberse nada desta iniciativa, que rematou perdida nalgún caixón da Xunta, ata que volviu a desempoarse na seguinte reunión do Observatorio Galego, a do 22 de decembro de 2010, tras meses esixindo unha reunión dese organismo -mesmo mediante denuncias de ADEGA ante o Valedor do Pobo- para, entre outras cousas, poder tratar a declaración de Parque Natural do Monte Pindo.

Nesa xuntanza ADEGA e outros colectivos pediron explicacións pola rocambolesca tramitación da protección do Carballo anano, e sobre todo porque dous anos e pico despois aínda non se fixese efectiva. Parece que esa reunión si supuxo un revulsivo, e se ben aínda tardaría case 7 meses máis, finalmente o 1 de xullo de 2011 a Consellería de Medio Rural aprobou incluír o Quercus lusitanica* no Catálogo, cousa que non pasaría ata un mes despois; 3 anos, 4 meses e 22 días de espera, que para o Carballo anano puideron ser demasiados.

Malia a lentitude dunha administración anquilosada, finalmente ADEGA e a Asociación Monte Pindo podemos celebrar a proteccion definitiva do Carballo anano do Monte Pindo, que só será posible coa implicación de todos e todas na defensa deste monte. Todos temos que ser conscientes da relevancia deste auténtico tesouro natural que temos o privilexio de compartir con pequenas zonas de Marrocos, sur de Portugal e Andalucía, e que debemos ser quen de legar a fillos e netos para que poidan seguir disfrutándoo.

Asi mesmo, cremos que agora o Parque Natural cobra máis sentido que nunca, pois cada vez queda máis claro que a razón está da nosa parte, e que se non temos aínda Parque Natural é por pura falta de vontade política do actual executivo autonómico.

Pero se facemos a suficiente presión veciñal e cidadá, esta postura pode e debe modificarse. Non debemos relaxar a nosa aposta polo medio, temos que seguir ampliando a nosa reivindicación a máis xente e máis sitios, sumando os apoios, ideas e esforzos de todas as persoas interesadas no noso medio á Asociación Monte Pindo Parque Natural. Anímate a apoiarnos!

Ah, e xa podes mercar na nosa tenda a camiseta do Carballo Añón que editamos para conmemorar este evento histórico!

*NOTA: Ademais do carballo anano, tamén se inclúen nesta actualización do catálogo a bucina mariña (Charonía lampas L.), a libélula (Oxygastra curtisii), a aguia pescadora (Pandion haliaetus L.) e curroxo real (Phoenicurus phoenicurus L.) dentro das aves, asi como os morcegos Nyctalus noctula e o Nyctalus lasiopterus dentro dos mamíferos. Dase a circunstancia de que, a excepción do Carballo Anano, todas elas están xa incluídas no Catálogo Español de Especies Amenazadas.

23/07/11

O Albariño Valtea promociónase cunha imaxe do Olimpo Celta

É indiscutible que as fermosas estampas que nos regala o Olimpo Celta a veciños e visitantes non pasan desapercibidas, tampouco para a promoción das calidades galegas. Despois de Iberia, son agora as Adegas Valtea as que utilizan unha fermosa imaxe do Monte Pindo para a nova campaña promocional dos seus viños, recoñecidos -entre outras moitas distincións- coa certificación Galicia Calidade.

A fotografía da campaña, que non puido ser mellor escollida, foi tomada ao solpor desde o mirador do Ézaro, configurando polo tanto a unha imaxe penumbrosa que realza aínda máis a policromática e contrastada textura desta ladeira do Pindo, permitindo aprezar o característico perfil do monte, o escarpado val que conforma o río Xallas na súa desembocadura tras caer en fervenza sobre o Océano Atlántico, asi como parte do pobo e o porto do Pindo. As tonalidades deste atardecer enfatizan aínda máis o misterio e a maxia que a tradición oral constatou nesta paisaxe.

A estas horas esta estampa do Olimpo Celta xa está en milleiros de casas galegas entre as follas da Voz de Galicia, de onde se extraiu a imaxe que encabeza este artigo, asi como noutros medios de comunicación.

A Asociación Monte Pindo saúda e agradece que por fin as casas comerciais galegas e internacionais aproveiten a imaxe do Monte Pindo para beneficio das dúas partes, ligando os seus valores naturais, patrimoniais e etnográficos aos dos propios produtos. Uns valores que agardamos ver protexidos axiña cunha declaración de Parque Natural que cada vez é máis esperada.

20/07/11

Tras o éxito do Mercado Ecolóxico de Quilmas, estaremos no Festigal

Éxito rotundo. Só asi se pode calificar o desenvolvemento do Mercado Ecolóxico en defensa da terra, que tivo lugar en Quilmas a fin de semana pasada. E é que a pesar da choiva que percutiu durante toda a xornada e que ameazou con converter en fracaso o encomiable esforzo da Cooperativa Ecolóxica Raíña Lupa (que organizou o evento), esta primeira edición bateu todas as espectativas, con cerca de 30 postos de artesanía, produtos hortofructícolas, informativos... e centos de visitantes e curiosos, tantos que a polbeira tivo que recoller antes de tempo por ter esgotado as 150 racións que calculara para o evento.

Como non, a nosa Asociación estreouse cun posto propio neste tipo de eventos, tamén moi exitoso ao ter difundido a centos de persoas os valores do Pindo e os obxectivos da nosa Asociación; de feito rematamos a xornada cuns 20 afiliados máis, entre eles persoeiros tan destacados coma o escritor Manolo Rivas ou a historiadora Encarna Otero.

Por primeira vez, Monte Pindo Parque Natural estará representado no Festigal
Demostrándose tan atinada a nosa presenza neste tipo de eventos, pois contribúen a dar a coñecer aínda máis as características que obxectivamente recomendan a declaración de Parque Natural no Monte Pindo, a nosa Asociación tamén vai estar representada por primeira vez no Festigal, na décima edición que vai desenvolverse no Campus Sur de Santiago de Compostela o 24 e o 25 de xullo (Día da Patria Galega), onde instalaremos un posto na Feira de Asociacións co que esperamos sorprender a uns cantos.

Animamos a todos aqueles que estén en Santiago de Compostela o domingo 24 ou o luns 25 de xullo a darse unha volta polo stand da nosa Asociación, onde teremos todo tipo de material informativo e publicitario dunha reivindicación que segue a amplificarse e a romper barreiras: a declaración do Monte Pindo como o 7º parque natural galego.

10/07/11

A Asociación Monte Pindo estará no Mercado Ecolóxico de Quilmas

A Asociación Monte Pindo Parque Natural vai estar presente cun posto informativo no Mercado Ecolóxico pola defensa da Terra en Quilmas, formidable iniciativa que se vai desenvolver o vindeiro sábado 16 de xullo nesta fermosa localidade carnotá ameazada pola ampliación da piscifactoría, despois de aceptarmos o convite da Cooperativa de Agricultura Ecolóxica Raíña Lupa, a entidade organizadora coa que xa vimos colaborando a cotío.

Os organizadores están a preparar diversas actividades simultáneas, pero a principal é unha mostra de produtos agrícolas, artesanía local, música e gastronomía... todo pola defensa da terra e de quen a traballa, a coida, a disfruta e a protexe, pois a iniciativa e o propio colectivo deben a súa existencia á honrosa causa da loita que se está a levar a cabo pola xente de Quilmas e doutros lugares en contra das ampliacións e novas plantas piscícolas.

Convidamos a todos os que amen o Monte Pindo e o medio natural en xeral a asistir a este mercado que terá un marcado ambiente festivo e que servirá ademais para que tod@s disfrutedes do lugar, do seu patrimonio (cabaceiras, muíños, praias, agras e o propio Monte Pindo) e das xentes e a realidade diaria.
RELACIÓN DOS EXPOSITORES
Alimentación
  • Cooperativa de Agricultura Ecolóxica Raíña Lupa - Horta Ecolóxica, fariñas, patacas, conservas, mel e pan.
  • Cooperativa Senra - A Estrada - Horta ecolóxica e mel.
  • Finca da Cora - A Estrada - Horta ecolóxica, pasteis, galletas, conservas...
  • Dolores - Teo - Horta ecolóxica e rosquillas
  • Xulio e Belén - Cambre - Pan e repostería ecolóxicas
  • Equisol - Santiago - Comercio Xusto
  • Menduíña - Cangas - Cervexa artesá
  • Chus - Ulloa - Queixos
  • Pulpeira Ánxe - O Carballiño - polbo
Apicultura
  • Comunidade de Montes de Caldebarcos e San Cibrán - Carnota - Mel
  • Santi e Carmen - Louro - Mel
Artesanía
  • Charamusca- Artesanía en cartón pedra- Carnota
  • Nacho Porto- Cerámica- Carnota
  • Bolatola- Xabróns e cremas artesás- Carnota
  • Cesteiro de Rois- de xestas, carqueixa, etc...- Rois
  • Cesteiro de Portosón- Bimbio e ferramentas- Portosón
  • Charo- Cerámica- Carnota
  • Tani- Coiro- A Ulloa
  • Susana- Cerámica- O Courel
  • Cristina- Cremas, xabróns con ingredientes naturais- O Courel
Postos informativos
  • Cooperativa de Consumo Responsable Zocamiñoca (A Coruña)
  • Asociación Monte Pindo Parque Natural (Carnota)
  • ADEGA (Galicia)
  • Sindicato Labrego Galego (Galicia)