20/12/13

Cúmprense 100 días da destrución do Monte Pindo sen detencións nin avanzos

Imaxes apocalípticas do incendio
Cen días despois, o dramático incendio que desde o 11 de setembro acabou por destruir ecoloxicamente o Olimpo Celta segue impune. Non houbo ningún avanzo na investigación da autoría, e desde logo ningunha detención. Ningún político responsábel do desastre presentou a súa dimisión pola nefasta xestión forestal e medioambiental do PP na Xunta, nin tampouco abrandaron á hora de destinar por fin ao Olimpo Celta a protección e os investimentos que desde hai 3 anos se piden na zona, nin tampouco indemnizacións para os veciños que viron as súas casas, explotacións e propiedades afectadas polo virulento lume, ou para as mariscadoras e os mariñeiros que viron o seu único medio de vida afectado. Nada de nada.

Matalobos (LVG) ironiza sobre a
suposta salvación do carballo anano
As pallas que trouxo a Xunta ata o mirador de Louredo, e que serviron para ter un helicóptero privado cimbrándoa durante tres días no 0,16% da superficie queimada (ata que acadaron o titular desexado) rematou abandonada durante semanas no lugar, ata que se repartiu entre a veciñanza para as súas actividades agrícolas, e realmente foi o mellor que puido pasar pois xa estaba comezando a apodrecer. O mesmo podemos dicir do efémero "voluntariado" da Xunta, que tras uns días na zona a pensión completa (e cunha manutención notabelmente superior ao que custaría contratar operarios e operarias en Carnota) marchou sen deixar rastro. A eles queremos recoñecerlle a súa xenerosidade e boa vontade, fosen ou non conscientes do xogo ao que se prestaron. Tampouco foron máis aló as demais medidas estabelecidas na Xunta no Monte Pindo, e segundo a cal lograran evitar "o 90%" das escorrentías. Tendo en conta que as referidas actuacións só se desenvolveron no entorno do Rego Voitureiro (tamén chamado Rego de Amil), e que no resto do espazo natural nada se fixo, isto resulta cando menos discutible, por non dicir burlesco: Fixéronse ali porque é o único lugar do monte Pindo onde se pode acceder en coche. Logo onde non se accede en coche o perigo de riadas non existe?


Punto na Cima da Arca onde comezou o incendio do 11 de setembro

Por último, as pesquisas policiais non deron ningún resultado; estiveron dando auténticos paos de cego, e esta Asociación pode falar con coñecemento de causa. 100 días despois, e á falta de que aparezan os pirómanos pantasma de Feijóo, oficialmente ninguén ten a culpa do incendio do Monte Pindo. Pero na zona todos sabemos que si hai culpábeis, e non son persoas sinistras con chisqueiro agochadas en covas senón uns señores ben traxeados que lles gustan as cámaras, os cargos e os cartos pagados por todos nós para facer exactamente o contrario do que todos nós pedimos. Tal vez, cen días de cortesía despois, chegou o momento de comezar a enumerar os politicos profesionais que contribuiron activamente a que hoxe o Monte Pindo esté morto:
  • Alberto Núñez Feijóo, Presidente da Xunta
  • Agustín Hernández Fernández de Rojas. Conselleiro de Medio Ambiente, Territorio e Infraestructuras (CMATI)
  • Ricardo García-Borregón. Ex-Director Xeral de Conservación da Natureza (CMATI)
  • Rogelio Fernández Díaz, Subdirector Xeral de Espazos Naturais e Biodiversidade (CMATI)
  • Carlos Muñoz Martínez. Xefe de Servizo de Conservación da Natureza na Coruña (CMATI)
  • Rosa Quintana Carballo. Conselleira de Medio Rural
  • Tomás Fernández-Couto. Secretario Xeral do Medio Rural e Montes
  • Marisol Piñeiro Martínez. Deputada do PP natural de Carnota
Lodos na Berberecheira
Todos e cada un deles levan tres anos pasando olimpicamente do Olimpo e ignorando todas as alarmas. Calquera deles leu nestes tres últimos anos ducias ou centos de titulares na prensa pedindo protección para este espazo. Calquera deles podería ter aceptado reunirse con nós cando se lle pediu. Calquera deles podería ter tomado a iniciativa. Pero ningún deles fixo absolutamente nada e consecuentemente os peores presaxios cumpríronse. Por certo, boa parte destes dirixentes nos que recalan as competencias do medio ambiente e do urbanismo galego están imputados por algún delito medioambiental, urbanístico ou de corrupción.

Grazas ao seu pasotismo, neglixencia e incompetencia, o Monte Pindo ardeu e con el as súas -como mínimo- 647 especies naturais, 101 delas protexidas. O único que fixeron é dicir que malo será que o carballo anano non sobreviva.

O lume destruiu explotacións agrogandeiras e apícolas, queimou hortas, cortes e alpendres, fundiu persianas e ennegreciu as casas dos nosos veciños. O único que fixeron é negarse a activar ningún tipo de indemnizacións alegando basicamente que quen non teña un seguro privado se fastidie.

As riadas "evitadas pola Xunta"
As riadas de cinzas contaminantes estragaron camiños e espazos públicos, cubriron bancos marisqueiros, inundaron vivendas. O único que fixeron é dicir que evitaran o 90% das riadas por ciencia infusa.

A catástrofe demostrou que o Monte Pindo non está protexido, que a Rede Natura neste país é papel mollado (asi foi denunciado recentemente ante a Unión Europea) e que a figura do Parque Natural era unha excelente idea para protexer e desenvolver este espazo. O único que fixeron é dicir que o chamizo aínda fumeante ao que quedara reducido o Monte Pindo estaba sobradamente protexido.

Manifestación en Compostela
Milleiros de persoas e 89 entidades sociais percorreron sucesivamente o Monte Pindo e as ruas da capital galega para denunciar o que pasou e pedir un cambio de modelo forestal, ambiental e rural que nos permita ter un futuro aquí, onde nacemos e de onde non queremos marchar. O único que se fixo é dicir que se non estamos dacordo co seu modelo fracasado é porque estamos politizados (bonito termo para que un político profesional ataque ao veciño que non está dacordo con el).

100 días despois, non conseguiron deter a ninguén polo incendio. O único que fixeron é dicir que os veciños tivemos a culpa insultando aos milleiros de veciñas e veciños de Carnota, Dumbría e Mazaricos que vivimos nos lindes do Olimpo Celta. 15 días despois aínda non pediron perdón.

Marcha verde polo Olimpo Celta
A pesar de tantos e tantos desprezos, nin sequera as nosas continuas chamadas ao diálogo e a nosa mellor vontade reciben sequera resposta, rozando a ilegalidade e a mala fe por parte da Xunta e demostrando o seu fanatismo partidario. O último contacto directo que tivemos coa Xunta foi en febreiro do 2012. Tras multitude de solicitudes de reunión, chamadas, e despois do incendio, a única noticia que recibimos da Xunta, cal can do hortelano, foi que se seguiamos plantando carballos e castiñeiros no Monte Pindo nos preparáramos para unha avalancha de multas, o que nos obrigou a paralisar SOS Monte Pindo. Con este goberno estamos nas mans da sorte.

18/12/13

O Monte Pindo xa ten a súa tenda!

O Medallón das Sete Pitas ou Pléiades
A Asociación Monte Pindo Parque Natural lanza no día de hoxe a súa flamante tenda en Internet, tenda.montepindo.org,  para canalizar os pedidos de material da nosa Asociación que ata agora só se podían recoller personalmente no Pindo ou nas nosas actividades e actos públicos.

A entidade social carnotá aspira asi a incrementar a visibilidade das problemáticas do Olimpo Celta e tamén o propio calvario que está a atravesar a nosa entidade por mor da brutal persecución política á que se ve sometida pola actual Xunta de Galicia e dos seus apéndices, e tamén por suposto trata de recadar fondos que nos permitan continuar a desenvolver a nosa intensa actividade sen depender de subsidios e subvencións de ningunha administración ou empresas que puideran mermar ou coartar a nosa liberdade de dicir o que temos que dicir ou de facer o que temos que facer.

Ra de SOS Monte Pindo
Ademais das clásicas gorras e camisetas, ou a literatura coma a obra colectiva Versos no Olimpo recentemente editada pola nosa entidade mediante subscrición popular, existen verdadeiras rarezas de coleccionista imposíbeis de atopar noutro lugar coma a fermosa reprodución realista do Medallón das Sete Pitas, enigmático obxecto arqueolóxico aparecido no Olimpo Celta e desaparecido na guerra civil, ou unha divertida Ra de San Antón, símbolo da operación de rescate do Monte Pindo tras o lume deste verán, feita polo Obradoiro Charamusca (Canedo - Carnota). Tamén se poden mercar simbolicamente carballos e castiñeiros para plantarmos no Monte Pindo.

Como asociación sen ánimo de lucro que é os beneficios de todas as vendas irán exclusivamente destinados ao desenvolvemento das actividades da nosa Asociación, nomeadamente o proxecto SOS Monte Pindo co que pretendemos devolver á vida o Olimpo Celta asasinado pola cobiza humana e o desleixo da Xunta.

15/12/13

A Xunta culpa agora á veciñanza do incendio do Monte Pindo

Tomás Fernández-Couto. Fonte: ECG
O Monte Pindo volveu recentemente ao Parlamento a instancia do BNG que esixiu novamente que a Xunta deixe de ignorar todas as voces que piden atención para a situación do macizo carnotán e que dunha vez comprometa prazos e investimentos para a restauración ecolóxica deste espazo protexido -especialmente logo de que a Xunta obrigara a paralisar os traballos de SOS Monte Pindo- baixo a ameaza de sancións- e tamén actuacións preventivas para que este tipo de catástrofes non se volvan a repetir á volta duns anos.

Pois ben, a Xunta a través do seu director xeral de Montes, Tomás Fernández-Couto, asegurou entre outras lindezas que as actuacións desenvoltas polo seu gabinete, denunciadas por procurar tan só o efecto mediático, serviran para atallar "o 90%" das escorrentías e, o máis polémico, a súa arrogancia chega ao extremo de asegurar que a veciñanza e o concello eran culpábeis directos do incendio por, en resumo, non ter o monte limpo.

Esta Asociación quere deixar moi claro que a culpa do incendio que o 11 de setembro destruiu o Monte Pindo non é culpa dos veciños do Pindo, Caldebarcos, Quilmas, Ézaro, Fieiro, Arcos, etc..., e está disposto a ir onde faga falta a defender a honra dos veciños acusados en falso e sen probas. A culpa do incendio é da chispa que o provocou e de que un monte que a Xunta ten a encomenda de protexer estivera absolutamente abandonado. Os veciños somos simples vítimas desta situación.

É insultante que unha administración que acaba de ameazar con durísimas sancións á veciñanza por traballar no Monte Pindo diga agora que o incendio foi culpa dos mesmos por non traballar no dito espazo cando iso lle correspondía á Xunta, que brillou pola súa ausencia. E o peor de todo é que no caso concreto do Monte Pindo existía un importante movemento social que lle estaba a pedir por activa e por pasiva que fixeran algo no espazo para evitar a traxedia que finalmente se produciu ante o seu absoluto abandono.

Sobre as supostas escorrentías evitadas, está claro que a non ser que a Xunta de Galicia teña algún tipo de influencia directa sobre a meteoroloxía é imposíbel que evitaran nada pois só actuaron nunha ínfima parte da superficie, e ademais con medidas estéticas na busca do titular. A día de hoxe máis do 99% do Monte Pindo segue sen ver ningún tipo de actuación, e o que nel pase dificilmente pode ter que ver coa Xunta. A realidade que non poden agochar é que nos poucos días de choiva intensa que se teñen producido desde o incendio produciuse unha auténtica avalancha de cinzas sobre aldeas e bancos marisqueiros, tal e como lle viñamos avisando.

Por outra parte, a Xunta segue sen contestar e ningunha das preguntas que lle levamos feito desde o incendio: nin nos concederon a reunión solicitada en decembro do 2012 e setembro de 2013, nin nos facilitaron o informe técnico favorábel á declaración do Monte Pindo coma Parque Natural que ocultaron deliberadamente ata a data, nin nos contestaron á información que lle solicitamos sobre o custe do operativo de extinción e os investimentos no Olimpo Celta desde o 2013 ata o incendio3.

É obvio que a Xunta está a ocultar as súas miserias para non ter que recoñecer publicamente o notorio fracaso da súa xestión medioambiental, e non conformes con iso incluso está disposto a empregar o convenio franquista que delega nese organismo a xestión do Monte Pindo, titularidade do Concello de Carnota, para empregalo como ariete político e para frear os intentos desesperados da veciñanza por salvalo Olimpo Celta da sentenza de morte á que parece condenado polo desleixo desta Administración.
Mira o debate parlamentar en Youtube