Unha delegación do Monte Pindo volve á Consellería o 3 de xuño

Despois de 9 meses agardando, por fin o Olimpo Celta volve a ter un lugar na axenda da Xunta. Será o vindeiro venres, 3 de xuño, a partir das 13:00 horas, no edificio da Consellería en San Caetano (Compostela), segun nos confirmaron esta mesma mañá fontes da conselleira.

Solicitude de reunión

Malia que a xuntanza se solicitou o pasado 5 de outubro de 2015 coas -daquela- recén nomeadas conselleiras de medio ambiente, Beatriz Mato Otero, e de medio rural, Ánxeles Vázquez Mejuto, por tratar temas transversais de ambas áreas, finalmente por parte da Xunta só está confirmada a asistencia da directora xeral de conservación da natureza, Ana María Díaz López.

A reivindicación veciñal estará representada por Xilberto Caamaño Beiro e Mario Maceiras Dosil, presidente e secretario, respectivamente, da Asociación Monte Pindo Parque Natural. Representando aos titulares do Monte Pindo asistirán Ramón Noceda Caamaño, alcalde de Carnota, e Xoán Lestón González, representante da CMVMC Caldebarcos - San Cibrán. Por último, en nome do mundo académico, asistirán en respaldo da proposta Manuela Costa Casais, profesora de xeografía da USC, Javier Amigo Vázquez, profesor de botánica da USC, e Serafín González Prieto, presidente da Sociedade Galega de Historia Natural.

Esta nutrida e variada delegación tentará sondear a sensibilidade ambiental das novas persoas a cargo destas áreas para lograr que a Xunta se aveña finalmente a revertir a situación de parálise administrativa que mantén no Monte Pindo, e moi nomeadamente que acepte iniciar a tramitación da declaración do Parque Natural, unha medida que sen supoñer ningunha restricción que non exista xa, si vai traer as tan necesarias medidas de posta en valor, protección e desenvolvemento sostible do entorno; un posicionamento a favor da Xunta suporía o éxito dunha iniciativa que tras 5 anos subscita un nivel de apoio social incontestable.

Por outra parte, a comitiva buscará recuperar as canles de diálogo e conseguir o levantamento do veto que a Xunta ten imposto sobre todas as iniciativas de repoboación da nosa entidade baixo a ameaza de sancións, unha medida sen precedentes que xa se prolonga durante dous anos e medio, demasiado tempo perdido.

Feijóo anuncia a Rede de Parques Naturais creada hai case unha década polo executivo anterior

Consello de Goberno da Xunta

En 2007, tres anos antes de nacer Monte Pindo Parque Natural, a Xunta de Galicia creaba a Rede de Parques Naturais de Galicia. Aínda chegaría a rexistrar marca e logotipos, e a constituir un ano despois o Consello da Rede de Parques Naturais que elaborou un exhaustivo informe de situación. Pouco despois o executivo autonómico cambiou de mans, accedendo ao goberno un Partido Popular que deixou este asunto nun caixón. Pois ben, case unha década despois, en vésperas dun inminente proceso electoral, a Xunta presenta a "primeira Rede de Parques Naturais de Galicia" que "permitirá unha xestión coordinada" destes espazos e "garantirá a súa conservación".

O anuncio da "creación" da Rede de parques naturais

Este anuncio feito polo propio presidente, Alberto Núñez Feijóo, xusto despois do Consello da Xunta do 19 de maio de 2016, publicitaba algo que en realidade fora creado nun Consello da Xunta do 19 de xuño de 2007, o que subscitou de inmediato a reacción do ecoloxismo galego. Este foi o caso da Sociedade Galega de Historia Natural (SGHN), que saiu á palestra para criticar un anuncio que tildan con moita retranca de "milagreiro renacemento", para despois calificar de "pouco racionais" as políticas da Xunta nesta materia nos últimos anos, para o que poñen coma exemplo o "adiamento sine die das propostas para a creación de novos parques", coma o do Monte Pindo.

Logotipo rexistrado en 2008

Cabe lembrar que a SGHN foi piar desde o inicio da loita polo Parque Natural do Monte Pindo, unha reivindicación que, en efecto, o PP impediu prosperar ata en 4 ocasións no Parlamento sen aducir ningunha razón sensata. Tamén temos que lembrar a actitude da Xunta de Feijóo coa nosa entidade. Hai dous anos e medio que vetou todas as actividades de repoboación do Monte Pindo baixo a ameaza de sancións. Faltaron ao respecto a toda a veciñanza á que acusaron sen probas de estar detrás do incendio de 2013. Negáronse a escoitar e atender as nosas propostas, ideas e suxerencias, que logo se demostraron atinadas. Vulneraron 5 leis galegas, españolas e europeas ao negarnos información que só logramos obter a través do Valedor do Pobo. Nin sequera temos aínda data para unha reunión que lle solicitamos hai 9 meses, nada máis tomar posesión as novas conselleiras de medio ambiente e medio rural. E ó que é peor, a nivel local o PP pasou de defender os parques naturais a combatilos inventando e difundindo entre a poboación carnotá falsos prexuízos dos parques naturais para as vidas da veciñanza, mentiras que outros nos esforzamos cada día en desmontar para defender a boa imaxe dos Parques Naturais e das restantes medidas e normas das que os galegos e galegas nos dotamos para conservar o noso medio natural para as xeracións vindeiras.

Este é o trato que o goberno de Feijóo, tan preocupado agora polos Parques Naturais, dispensa á hora da verdade á primeira Asociación da historia do noso País que xurde desde a veciñanza local para pedir que un espazo natural se declare Parque Natural, despois de nada menos que 14 anos sen ningún novo parque natural galego, comportándose non só coma un goberno pouco racional, como ben di a SGHN, senón tamén irresponsable; un goberno que trata de ocultar dez anos de abandono dos espazos naturais galegos sacando do caixón unha iniciativa que nunca se dignou a aplicar e que agora presenta coma novidosa, vendéndonos fume cando para esta Xunta os parques naturais galegos foron, son e seguirán sendo a última das súas preocupacións.

Monte Pindo dótase de comisións de traballo abertas á participación de toda a sociedade

A Asociación Monte Pindo Parque Natural vén de decidir poñer en marcha cinco novas comisións de traballo desde as que de agora en adiante organizará toda a súa actividade, en base ao acordado na última xuntanza da Comisión Rectora da entidade, e en aplicación do artigo 17 dos Estatutos. 

Mediante esta nova estrutura interna a organización veciñal aspira non só a ser máis útil para a sociedade e eficaz e áxil no seu funcionamento interno, senón tamén posibilitar que este sexa máis dinámico, horizontal e democrático, aberto á participación activa de toda a súa base social -sen limites- nas distintas liñas de traballo das que ata agora se ocupaba a Comisión Rectora, aproveitando as importantes sinerxias que a nosa asociación ten creado con amplas capas da sociedade, asi coma con outras entidades e institucións, nos seus cinco anos e medio de existencia. Deste xeito, para poder participar nunha comisión nin sequera é necesario asociarse, senón só manifestar o interese dun ou dunha na mesma.

A entidade veciñal agarda deste xeito evitar que toda a carga de traballo que se ve obrigada a asumir a nosa entidade polo absoluto desinterese da Xunta neste espazo, siga recaendo case en exclusiva nos 15 membros da Comisión Rectora e que asi moitas máis persoas poidan comprometerse coa protección do Olimpo Celta e involucrarse activamente na solución das problemáticas que atinxen ao Monte Pindo e na posta en valor deste espazo natural único no mundo, para beneficiar asi a toda a veciñanza da bisbarra.

As cinco comisións teñen en común que funcionarán autonomamente, e que todas terán unha portavocía representada na Comisión Rectora. Son as que seguen:

Comisión de Medio Ambiente
Ocuparase de:

• Estudo e divulgación da biodiversidade presente no Monte Pindo
• Identificación de ameazas a especies protexidas
• Iniciativas e actividades de conservación dos hábitats e ecosistemas naturais e a recuperación daqueles espazos degradados pola man do home
• Medidas de protección contra os incendios
• Erradicación de especies invasoras
• Xestión e mantemento do Catálogo de Especies do Monte Pindo
• Concreción das medidas de protección globais e específicas a adoptar no espazo natural: Parque Natural, espazo natural de interese local, xeoparque, reservas naturais, etc...

Comisión de Patrimonio Material
Ocuparase de:

• Estudo e divulgación da xeoloxía do Monte Pindo, identificación de ameazas e medidas de protección necesarias
• Localización de xacementos arqueolóxicos, identificación de ameazas e medidas de protección necesarias
• Identificación, recuperación, conservación e sinalización dos sendeiros tradicionais
• Localización e catalogación das covas, identificación de ameazas e medidas de protección necesarias
• Xestión e mantemento do Catálogo de Patrimonio Material do Monte Pindo
• Pular pola creación dun centro visitábel na zona no que se depositen os distintos materiais arqueolóxicos aparecidos na contorna
• Elaboración dun catálogo de roteiros GPS do entorno

Comisión de Patrimonio Inmaterial
Ocuparase de:

• Investigación e divulgación da Historia do Monte Pindo e do entorno local e comarcal
• Recuperación da tradición oral do entorno: lendas, contos, historias, etc...
• Recuperación da toponimia e microtoponimia tradicional
• Dotación de libros á Biblioteca do Monte Pindo

Comisión de Comunicación
Ocuparase de:

• Deseño da estratexia da asociación
• Relacións coa base social da Asociación
• Relacións coa sociedade local e cos movementos veciñais
• Relacións cos movementos sociais e causas afíns
• Relacións coas institucións
• Xestión e mantemento dos espazos web da Asociación
• Xestión e mantemento do correo electrónico da Asociación
• Xestión e mantemento das redes sociais da Asociación (Facebook, Twitter, Instagram, LinkedIn, Youtube...)
• Relacións cos medios de comunicación

Comisión de Organización
Ocuparase de:

• Loxística e intendencia do local
• Elaboración do inventario da asociación
• Seguemento das finanzas e do cobro de cotas
• Xestión do almacén de material da Asociación
• Xestión de pedidos da tenda virtual da Asociación
• Xestión dos préstamos da Biblioteca do Monte Pindo
• Calendario de limpeza do local da Asociación

Para participar nunha ou varias comisións, basta con indicalo enviando un correo electrónico a info@montepindo.org.

Nace a Biblioteca do Monte Pindo apadriñada por Alfredo Eiras

Alfredo Eiras e Laura Caamaño, xunto coas obras que nos doou o escritor

Á mesma hora en que nacía na rede a Biblioteca do Monte Pindo, que xa é desde hoxe accesíbel en Internet no enderezo biblioteca.montepindo.gal, en Betanzos o escritor Alfredo Eiras entregaba a Laura Caamaño, membra da Comisión Rectora de Monte Pindo Parque Natural, unha impresionante colección de obras literarias dedicadas total ou parcialmente ao Olimpo Celta, e en especial ao seu aspecto máis mítico e máxico.

Eiras dedicounos as súas obras

Alfredo Erias (Abegondo, 1954) é licenciado en Xeografía e Historia pola Universidade de Santiago. Arquiveiro bibliotecario do Concello de Betanzos e director do Museo das Mariñas, e autor dunha prolífica serie de obras literarias, ben en títulos propios ou ben en obras colectivas coma o Anuario Brigantino, obra referencial da divulgación histórica galega que dirixiu durante máis de 20 anos. Tamén destacou na súa faceta de debuxante e pintor. Agora sumou á súa brillante traxectoria ser o padriño involuntario do nacemento da Biblioteca do Monte Pindo, unha das primeiras coleccións literarias do País dedicada a un espazo natural e nacida desde e para a sociedade.

Coas achegas de Alfredo Erias o catálogo de obras literarias que temos a disposición da sociedade xa medra ata preto dos 25 exemplares, se ben agardamos seguir sumando progresivamente máis obras que xa relacionamos nun listado de máis de medio cento de exemplares que aspiramos conseguir a curto e medio prazo, todo un reto tendo en conta o elevado custo de moitas destas obras e que a colección finánciase ao 100% con fondos propios da Asociación Monte Pindo Parque Natural. Para ampliar e mellorar a colección pedimos a axuda de todo o mundo, que pode colaborar a través dun formulario de achegas.

Nace contendo xa case o máis importante

O Monte Pindo, presente na súa obra

Porén, as obras de referencia e á vez máis difíciles de adquirir, e sen as cales esta biblioteca perdería moito do seu sentido, xa están afortunadamente entre os fondos: Antigüidades de Galicia, de Barros Silvelo; Los Montes do Pindo, de Barreiro Barral; Galicia Incógnita, de Pedro Marfany; a Guía de Galicia, de Otero Pedrayo... xa están a disposición do público xeral para a súa consulta física no noso local no Pindo (consulta mediante cita previa coa Asociación en info@montepindo.org), para o que a entidade veciñal habilitou unha sala de estudos no seu local. Tamén se permitirá o préstamo temporal das obras no caso das persoas asociadas á Asociación Monte Pindo Parque Natural, unha afiliación que custa 13 euros ao ano.

Grazas, Alfredo, pola túa axuda. Animamos a outros autores e editores no noso País a colaborar tamén coa construción desta colección única de obras literarias relacionadas co Monte Pindo, pois só desde o coñecemento podemos poñer en valor un patrimonio, o Monte Pindo, que nos faga seguir soñando.

Monte Pindo homenaxea as súas socias máis noviñas e crea a Biblioteca do Monte Pindo

Esta fin de semana tivo lugar a primeira xuntanza da nova Comisión Rectora da Asociaciòn Monte Pindo Parque Natural despois da pasada Asemblea Xeral Extraordinaria, que se converteu nun acto moi emotivo ao homenaxear a Helena e Julia, socias nº 145 e 146, as pequerrechiñas da nosa entidade xunto con Carlota, quen non puido participar nos actos. A directiva do colectivo ambientalista deulles cadanseu carné de socia, camiseta e un puzzle do Xigante para divertirse mentras coñecen un elemento tan simbólico do Monte Pindo. No mesmo acto tamén se entregaron os agasallos aos gañadores do sorteo polo 5º aniversario da Asociación.

A xuntanza serviu para actualizar as metas e obxectivos da Asociación e definir a súa axenda de actividades nos vindeiros meses, que consistirá en dúas subidas ao Monte Pindo este mesmo mes, dous roteiros de limpeza e recuperación de rutas e a 6ª edición do Simposium Monte Pindo, que se vai dedicar este ano á restauración da memoria histórica dos fuxidos no Monte Pindo durante a Guerra Civil.

Nace a Biblioteca do Monte Pindo
Asi mesmo, a Comisión Rectora de Monte Pindo Parque Natural determinou a creación da Biblioteca do Monte Pindo, unha colección de obras bibliográficas e audiovisuais dedicadas total ou parcialmente ao Olimpo Celta, incluíndo unha serie de obras descatalogadas desde hai décadas e moi difíciles de atopar xa, coma as primeiras edicións orixinais do Montes do Pindo de Barreiro Barral, gran obra de referencia sobre o macizo, o Galicia Incógnita de Pedro Marfany, a Guía de Galicia de Otero Pedrayo no que bautizou o Monte Pindo coma Olimpo Celta, ou o Antigüidades de Galicia escrito en 1845 por Barros Silvelo, e grazas ao que puidemos recuperar o Medallón das Sete Pitas. Todas estas obras e outras que iremos reunindo estarán á disposición do público xeral para a súa consulta nunha sala de estudo dedicada do noso local, e dispoñíbeis para o préstamo no caso das persoas asociadas.