A AAVV Os Castros de Pontedeume arrima o ombro polo Parque Natural no Pindo

Hoxe traemos a este espazo un novo apoio ao Parque Natural do Monte Pindo: e dicímolo no sentido literal da palabra: esta fin de semana varios autobuses do colectivo que vos imos presentar arribaron en Carnota para coñecer todos os secretos do Olimpo Celta, visita guiada na que estiveron acompañados por membros da Asociación Monte Pindo Parque Natural.

Trátase da Asociación de Veciños Os Castros, creada hai máis de 30 anos, que agrupa a máis dun cento de veciños de Centroña, unha fermosa parroquia costeira de medio milleiro de habitantes situada no leste do concello de Pontedeume, e cuxo obxetivo é dinamizar esta poboación organizando actividades populares tan diversas como cabalgada de reis, entruido, campionatos deportivos de todas as disciplinas, obradoiros de costura, cociña e ximnasia, e un longuísimo etcétera nos que non podían faltar roteiros por espazos naturais de toda Galicia.

Pola súa privilexiada ubicación costeira, Centroña destaca polas súas praias, pero non só: a súa igrexa románica e os seus castros de Castrelo e O Portiño, onde se atopou un torques de ouro, e a súa proximidade ao torreón dos Andrade ou á capela de San Miguel, datada no século XI, poden falar mellor que nós do esplendoroso pasado desta paraxe.

Mais no que se cingue estrictamente á nosa causa, o apoio e a visita deste colectivo ten unha relevancia fundamental: e é que Centroña atópase situado a carón do Parque Natural das Fragas do Eume. É destacable que un colectivo veciñal tan directamente "afectado" pola proximidade dun Parque Natural non só non o critique senón que incluso organicen saídas para visitar outros espazos naturais de Galicia que aspiran a obter o mesmo recoñecemento, como é o noso caso.

Esperamos que cos folgos da AAVV Os Castros, asi como cos da inmensa maioría da sociedade que xa se posicionou a favor, o noso Parque Natural do Monte Pindo esté cada día máis preto de situarse á altura do seu impresionante e máxico Parque Natural das Fragas do Eume.

O lendario veleiro "Sea Cloud" visita o Monte Pindo

Un namorado do mar, amigo da nosa Asociación, comunicounos hoxe moi emocionado que o mítico veleiro Sea Cloud (Nube de Mar) botou as 16:15 horas de hoxe o áncora aos pés do Olimpo Celta para contemplalo no seu esplendor rosado de media tarde, deixándonos unha máxica estampa que parece máis propia doutros tempos. Ao cabo dunhas cinco horas e tras reconfortarse longamente coa visión deste enclave marítimo privilexiado entre o Monte Pindo e a cercana fin do mundo dos nosos antergos, o Finisterrae, soltaron amarras con rumbo ás Illas Cíes.

No ano 1931 o "Hussar V", un impresionante veleiro de 4 paos e 110 metros de eslora, bicou por primeira vez as augas de Kiel (Alemaña) para non deixar desde entón de surcar os océanos de todo o mundo, para orgullo dos seus promotores, E. F. Hutton, daquela magnate de Wall Street, e a súa dona, Marjorie M. Post, herdeira dun importante emporio dos cereais. E é que a visión de 3 mil metros cadrados de tea empurrando tal navío a toda vela non é para menos.

A tripulación, formada por ata 72 homes e mulleres, dispuña das máis avanzadas tecnoloxías da época coma o primeiro telégrafo transcontinental privado ou un dos primeiros conxeladores de alimentos, e desenvolvían a súa actividade en estancias amobladas con antigüidades dignas de museo. Por iso este buque, cuxa primeira ruta uniu as oficinas que tiña o magnate en Oakland, San Francisco e New York, foi recoñecido como o máis luxoso de toda unha época, e ademais cobrou un importante papel durante diferentes etapas históricas.

Tras o divorcio do matrimonio, o navío serviu á dona e á súa filla para visitar os máis paradisiacos paraxes do planeta, xa rebautizado como Sea Cloud (o seu nome actual), e chegou a ser embaixada oficial dos Estados Unidos, salvavidas de magnates en bancarrota, buque da Garda Costeira americana, localizador de submarinos durante a Segunda Guerra Mundial e incluso buque de observación meteorolóxico...

Restaurado e actualizado por completo en 1979 con todas as novidades tecnolóxicas coma a comunicación por satélite, 80 anos despois o Sea Cloud segue a escribir páxinas nos libros de historia, aos que xa pode engadir a súa visita de hoxe ao Olimpo Celta.

Desde esta ligazón da web MarineTraffic.com podedes seguir en tempo real todas as peripecias deste histórico navío, aínda que de seguro serán moito máis intensas e envexables as sensacións que estarán vivindo neste mesmo intre os seus afortunados tripulantes.

Fotos: David Trillo

El País difunde a busca da cabra do Monte Pindo e ensalza o traballo da nosa organización

Rof fala dunha res "lixeira, pequena e de pelo longo"

O xornal de referencia dos diarios españois, El País, dedica hoxe unha extensa reportaxe a páxina completa da súa edición impresa (tamén dispoñible na rede) ao traballo que vén desenvolvendo a nosa Asociación, mais especialmente centrada no hoxe case esquecido feito da existencia dunha cabra autóctona no noso Olimpo Celta, que revelamos recentemente apoiándonos nun artigo publicado no ano 1928 polo gran difusor da gandeiría galega Juan Rof Codina.
A presenza desta hoxe extinta especie cabría sorprende a propios e extranos, aínda que non a todos: un veciño do Pindo, xa socio da AMPPN, asegura que: "antes do último incendio grande fai poucos anos, vianse desde a praia un pouco por encima da Laxe unha parexa, pero supoño que morreron".

Certo ou non, son moi numerosas as mensaxes que temos recibido estes días demostrando o interese non só dos xornalistas senón dos amantes do Monte Pindo congratulándose polo redescubrimento desta especie, agradecéndonos a labor de difusión dos valores deste espazo natural sen igual e ofrecéndonos todo o ánimo e apoio na tarefa de recuperar a fauna autóctona perdida, dificil pero ilusionante camiño que estamos dispostos a percorrer coa vosa axuda.

De feito na Asociación Monte Pindo estamos convencidos de que temos posibilidades reais de recuperar a cabra do Monte Pindo, ao igual que se recuperou no seu día o porco celta, que chegou a atoparse reducida a unha granxa portuguesa. Os esforzos da nosa organización concentraranse en pesquisar nos núcleos rurais de arredores do Monte Pindo, onde entendemos que hai máis posibilidades de éxito, comezando por Cabanude, Reboredo, Nuboa, Lugariño e Fieiro e ampliando progresivamente a área de busca. Calquera información que nos poida ser facilitada neste obxectivo seranos de moitísima axuda.

Desde este espazo só nos resta agradecer ao diario El País o seu interese na nosa organización e a nosa causa, asi como o recoñecemento ao noso humilde pero convencido traballo a prol do Parque Natural do Monte Pindo e en defensa do noso medio ambiente.